Фиген Башџи (46), која пред 16 години почнала да работи во бродоградилиштето на својот сопруг во турскиот град Адана за да се занимава со документацијата, со текот на времето ги научила финесите на занаетот и станала мајсторка за изработка на бродови, јахти и чамци, пишува Анадолу.
Башџи, мајка на две деца, во 2010 година одлучила да ги преземе сметководствените работи за да му помогне на својот сопруг Џумхур Башџи, кој има бродоградилиште во округот Караташ.
Во првиот период Башџи се занимавала со документацијата на бродоградилиштето, а додека ги следела производствените процеси, се заинтересирала за изработката на бродови, јахти и чамци.
Од својот сопруг и од мајсторите што работеле во бродоградилиштето, Башџи научила да заварува и да работи на струг.
Со текот на времето Башџи преземала задачи во различни фази од производствениот процес и станала мајсторка за изработка и поправка на пловни објекти.
Фиген Башџи за Анадолу изјави дека е среќна што со својот сопруг учествува во големи проекти.
Наведувајќи дека почнала да работи како сметководителка, Башџи рече: „Со текот на времето се заинтересирав за работата. Реков: ‘Можам да заварувам и слично.’ Постепено почнав. Многу уживам во ова место.“
Посочувајќи дека со текот на годините се навикнала на професијата на која ѝ посветила многу труд, Башџи продолжи:
„Кога почнав да работам, си реков: ‘Дали жените би се занимавале со оваа работа?’ Дури и малку се плашев, но додека работев си реков: ‘Зошто не?’ Секое место на кое влегуваат жените станува поубаво. Тешко е, но убаво и пријатно. Среќна сум, а и му помагам на сопругот. Кога човек работи и е продуктивен, сака да работи уште повеќе.“
Наведувајќи дека сака да минува време на бродоградилиштето, Башџи рече: „Кога изработуваме чамец, заварувам, го поврзувам моторот. Се занимавам со сè. Задоволна сум и мило ми е што почнав. Дури би сакала да почнев со оваа работа кога бев помлада. Многу сум среќна што имам свој придонес во бродови тешки 40-50 тони.“
Џумхур Башџи, пак, нагласи дека неговата сопруга може да ги извршува сите работи во бродоградилиштето и рече: „Мојата сопруга стана бродски мајстор што може да го води бизнисот и без мене. Воопшто не се грижам. Среќен сум со сопругата. Ме ослободи од голем товар. Се гордеам со неа.“
contact_the_ombudsman
is_there_an_error_in_this_story
