Admir Fazlagic
25 Јануари 2017•Ажурирај: 26 Јануари 2017
СКОПЈЕ (АА) - Агенцијата за електронски комуникации (АЕК) денеска во Скопје одржа прес-конференција на која информираше за најчесто пријавуваните проблеми на граѓаните во текот на 2016 година во доменот на електронските комуникации, односно мобилната и фиксната телефонија, мобилниот и фиксниот интернет и телевизијата, јавува Anadolu Agency (AA).
Директорот на АЕК, Сашо Димитријоски информираше дека кон контакт-центарот 190 во 2016 година имало 8.410 повици од граѓаните. Од нив, за 982 е поведена постапка за спор и повеќе од 80 проценти од споровите се веќе затворени. Димитријоски истакна дека најчесто пријавуваниот проблем е износот на доставената сметка од страна на операторот.
„Најчесто пријавуван проблем е сомнеж во вистинитоста на износот фактуриран од страна на операторот, т.е. висока сметка, потоа следат приговори за неквалитетна услуга, ненавремена услуга, роаминг и друго. Од анализите што ги направивме, околу 20 отсто од пријавите се за услуги во говорната мобилна телефонија. Поради тоа можеме да констатираме дека покриеноста со сигнал и квалитетот на сигналот е поле што треба и понатаму да се унапредува за корисниците да добијат услуга за која ќе бидат задоволни", рече Димитријоски.
Според анализата на АЕК за 2016 година, како втор најчесто пријавуван проблем се споровите за интернет-услугите во мобилната телефонија, на што се однесуваат 18 проценти од вкупниот број на пријави.
„Причините се речиси исти со веќе наведените, но треба да се истакне дека барањата за квалитетни услуги за мобилен интернет покажува колку корисниците во Македонија сѐ повеќе го користат интернетот не само во вообичаената комуникација, туку и во бизнисот“, истакна директорот на АЕК, Димитријоски.
Според него, значително намалување на пријавени спорови има во делот на роаминг услугите, што се смета дека е резултат на активностите коишто во континутитет ги презема АЕК.
„Процентот на споровите во роаминг услугите изнесува само 5,3 проценти. Тоа е резултат на активностите што во последните неколку години во континуитет ги презема АЕК, со што корисниците се навремено известени. Постигнат е голем напредок во остварувањето на потребите за роаминг услуги на корисниците во услови на зголемени патувања на граѓаните. Бројот на приговорите во 2016 година е намален за 36 проценти во споредба со 2015 година“, вели Димитријоски.
Тој потсети дека сферата на делување на агенцијата е во рамките на електронските комуникации, и апелираше граѓаните да пријавуваат проблеми со операторот само во однос на мобилната и фиксната телефонија, мобилниот и фиксниот интернет и телевизијата во земјата.
Во текот на мај 2010 година, АЕК воведе контакт-центар на бројот 190, со цел да се обезбеди подобра комуникација со корисниците на телекомуникациските услуги.
На овој број, сите корисници на услугите на телекомуникациските оператори можат да пријават евентуални проблеми во доменот на електронските комуникации.
Според податоците со кои располага АЕК, а се резултат на јавното мислење, свеста кај граѓаните за постоењето на бројот 190 расте од 2,2 проценти од испитаниците во 2014 на 8,4 проценти во 2016 година. Граѓаните можат бесплатно да ги пријават проблемите до контакт-центарот на АЕК.
Од 8 до 17 часот на корисниците им е достапен операторот, а по овој период од денот, корисниците можат да остават порака. Корисникот на 190 може да го пријави својот проблем и добива инструкции за начинот на решавање на спорот.
