Есмералда Хасани именувана за директорка на Државната разузнавачка служба на Албанија

Есмералда Хасани е именувана за директорка на Државната разузнавачка служба на Албанија (ШИШ), со декрет на претседателот Бајрам Бегај, пренесува Анадолу.

Во соопштението од Претседателството на Албанија се наведува дека именувањето е извршено на предлог на премиерот Еди Рама. „Пред донесувањето на декретот, спроведени се сите законски постапки за проверка, предвидени со законот за именување функционери на високи позиции“, се наведува во соопштението.

Во меѓувреме, медиумите објавија дека Хасани работела како советничка во Кабинетот на премиерот на Албанија. Хасани ја наследува на оваа функција поранешната директорка на ШИШ, Влора Хисени, која беше разрешена во септември, откако ѝ беше одредена мерката „куќен притвор“.

Специјалното обвинителство против корупција и организиран криминал на Албанија (СПАК) на 22 септември 2026 година потврди дека Специјалниот суд против корупција и организиран криминал (ГЈККО) на 21 септември ѝ ги одредил мерките „куќен притвор“ и „суспензија од вршење должност или јавна служба“ на Хисени.

Според СПАК, Хисени е осомничена за кривичните дела „Откривање тајни акти или податоци“ и „Помагање на сторител на кривично дело“. По овие случувања, претседателот Бегај донесе одлука за разрешување на Хисени од функцијата.

Според медиумските јавувања, истрагата се однесува на поврзаноста со други лица кои претходно биле предмет на истрага во случајот познат како „Случајот на Националната агенција за информатичко општество“.