هەولێر.. بازاڕی پەلەوەر لە رۆژانی هەینییدا

هەولێر-AA هێمن حوسێن

لە سەرەتای مانگی حوزەیرانی ساڵی ٢٠٠٠، بازاڕی کڕین و فرۆشتنی پەلەوەر لە شەقامی شێخەڵڵا گواسترایەوە بۆ گەڕەکی سەیداوەی شاری هەولێر و ماوەی ٢٢ ساڵە کاسبکاران لەم بازاڕە کار دەکەن.

رۆژانی هەینی جیاوازترە لە هەموو رۆژانی دیکەی هەفتە بەهۆی ئەوەی جوانترین و دەگمەنترین پەلەوەر و ئاژەڵی دیکەی وەک سەگ و پشیلە لەم بازاڕەدا نمایش دەکرێت و خوازیاران لە ناوەوە و دەرەوەی شار دێنە بازاڕەکە و کڕین و فرۆشتنیان پێوە دەکەن.

بەهۆی ئەوەی رۆژانی هەینیی زۆرترین کەس سەردانی ئەم بازاڕە دەکەن، هەر بۆیەش بەهۆی قەرەباڵغییەوە بەشێکی دەرەوەی شەقامی ٣٠ مەتری دادەخرێت.

یەکێک لە کاسبکارانی ئەم بازاڕە ئاماژە بەوە دەکات کە لە بەیانییەکی زووەوە دەچنە بازاڕەکە و تا نیوەڕۆ خەریکی کڕین و فرۆشتن دەبن و ئەوەش دەخاتەڕوو کە جگە لە خەڵکی ناوخۆی هەرێم، هەروەها لە شارەکانی دیکەی عێراق و خەڵکی بیانییش سەردانی بازاڕەکە دەکەن.

حاجی شەمسەددین محەمەد بۆ ئاژانسی ئانادۆڵو گوتی: "لەوەتەی ئەو بازاڕە هەیە منیش لێرە کار دەکەم، بەتایبەت رۆژانی هەینی لە بەیانییەکی زووەوە دێین بۆ ئەم بازاڕە و تا دوای نیوەڕۆ لێرەدەبین، لێرە هەموو جۆرە پەلەوەڕێک هەیە و ئەوەی زۆر خواستی لەسەرە بریتییە لە پۆڕ، کەو، بولبوول و سوێسکە کە نرخەکانیشیان جیاوازە و خەڵکێکی زۆریش مامەلەی پێوەدەکات".

هاووڵاتییەکی دیکە کە خەڵکی شارەدێی پردێی سەربە پارێزگای کەرکووکە، وەکخۆی دەڵێت بەهۆی دووری رێگاکەیەوە تەنیا لە رۆژانی هەینی سەردانی ئەم بازاڕە دەکات و کڕین و فرۆشتن بە پەلەوەری لێ دەکات.

تاریق جەمیل کەریم بۆ ئاژانسی ئانادۆڵو گوتی: "بەهۆی ئەوەی رێگام دوورە، دانیشتووی ناحیەی پردێی سەربە کەرکووکم، بۆیە هەر رۆژانی هەینی دێمە ئەم بازاڕە، بێگومان لە بەیانییەکی زوو دەگەمە ئێرە، لەم بازاڕە پەلەوەرەکانی وەک قاز و مریشک دەفرۆشم، ئەمە جگە لە قازانجەکە هاوکات حەز و خولیایەکی باشم هەیە بۆ بەخێوکردنی پەلەوەر".

تاریق جەمیل کەریم گوتیشی: "هەموو کەسێک دێتە ئەم بازاڕە، خەڵکی ناوخۆ، بیانی و هاووڵاتییانی ناوەڕاست و خوارووی عێراقیش رۆژانی هەینی سەردانی ئەو بازاڕە دەکەن".

بازاڕی کڕین و فرۆشتنی پەلەوەڕ دەکەوێتە سەر پردی سەیداوە و ماوەی ٢٢ ساڵە وەک بازاڕێکی میللی بووەتە شوێنی کڕین و فرۆشتنی جۆرەکانی پەلەوەر و ئاژەڵی دیکەی وەک سەگ و پشیلە و خوازیارانی ئەم بوارانە لە رۆژانی هەینییدا سەردانی بازاڕەکە دەکەن.