كه‌شوهه‌وای سارد له‌ ناوچه‌كانی رۆژهه‌ڵاتی توركیا

ئه‌رزەرۆم - AA

ناوچه‌كانی رۆژهه‌ڵاتی توركیا له‌ژێر كاریگه‌ری كه‌شوهه‌وای سیبریادان، له‌به‌رئه‌وه‌ له‌ وه‌رزی زستاندا به‌فر و سه‌رما و سۆڵه‌یه‌كی زۆر روویان تێده‌كات.

له‌م نێوه‌نده‌شدا له‌ شاری ئاگری به‌هۆی ساردی هه‌واوه‌ ته‌نانه‌ت تانكی به‌نزینی ئۆتۆمبێله‌كانیش به‌ستویه‌تی و هاووڵاتییان ناچارن له‌ڕێی به‌كارهێنانی ئاوی كوڵهاتووه‌وه‌ تانكی به‌نزینه‌كانیان گه‌رم بكه‌نه‌وه‌ و ئۆتۆمبێله‌كانیان بخه‌نه‌ كار.

به‌شێكی هاووڵاتییانیش ئۆتۆمبێله‌كانیان به‌ فه‌رش و به‌تانی داپۆشی تا له‌ به‌ستن بیپارێزن.

به‌هۆی ساردی كه‌شوهه‌واشه‌وه‌ هاووڵاتییان له‌كاتی هاتوچۆدا دووچاری سه‌ختییه‌كی زۆر بوون.

هه‌روه‌ها به‌شێكی رووباری موراد و جۆگه‌ی تاشڵیچای بووه‌ته‌ سه‌هۆڵ.

به‌هه‌مان شێوه‌ له‌ پارێزگای قەرس پله‌كانی گه‌رما به‌شێوه‌یه‌كی به‌رچاو دابه‌زیون و بارینی به‌فریش دیمه‌نێكی دڵڕفێنی دروستكردووه‌.

به‌شێكی هاووڵاتییان له‌م دیمه‌نه‌ سروشتییه‌دا وێنه‌ی یادگاری ده‌گرن.

له‌لایه‌كی دیكه‌شه‌وه‌ له‌ شارۆچكه‌ی ساریقامیش سه‌ربه‌ پارێزگای قەرس به‌هۆی ساردی هه‌واوه‌ ته‌مێكی زۆر دروست بووه‌، دره‌خت و گوڵه‌كانیش زوقومیان گرتووه‌ و جۆگه‌ی ئاوه‌كان به‌ستوونی.

له‌ پارێزگای ئه‌رزەرۆم-یش به‌فر بووه‌ته‌ تارای زیوینی شاره‌كه‌ و حه‌وزی ئاوه‌كانی سه‌ر شه‌قامه‌كان به‌ستوویه‌تی له‌ سه‌قفی باڵه‌خانه‌كانیشه‌وه‌ چلوره‌ هاتووه‌ته‌ خوار.

سه‌ر له‌به‌یانیش به‌هۆی ساردی هه‌واوه‌ له‌ چه‌ند ناوچه‌یه‌ك ته‌م دروست بوو.