hemn husain
28 ئادار 2016•نوێکردنەوە: 29 ئادار 2016
سەرەڕای بوونی قەیرانی دارایی بەڵام وەبەرهێنان لە پایتەختی هەرێمی کوردستان بەردەوامە و بڕیارە لەو چوارچێوەیەدا بازاڕێکی تایبەت بە ناوی بازاڕی داون تاون لە هەولێر بکرێتەوە کە یەک ملیار دۆلاری تێچووە و بۆ درووستکردنی مێزی دەستگێڕان 5 ملیۆن دینار سەرف کراوە کە بێ بەرامبەر بەسەر کاسبکاراندا دابەش دەکرێ. لە دەروازەی بازاڕی داون تاون كۆمەڵێك پەیكەری كەسایەتی ئافرەتی كورد دروست كراوە وەك ئاماژەیەك بۆ خەبات و ماندووبوونی ئافرەتانی كورد. پەیكەری یەکەم لە لای راستی دەروازەكە، هی ئافرەتێكە بەناوی عیسمەت خانم كچی پێشەوا قازی محەمەد، دامەزرێنەری كۆماری كوردستان و پەیكەری لای چەپی دەروازەكەش پەیكەری ساڵحە خانمی خێزانی شەهید خەیروڵڵا عەبدولكەریمە، وەكو نموونەی ئافرەتێكی خەباتگێڕ، لەدوای ئەویشەوە پەیكەری لەیلا قاسم و مەستوورە خانی ئەردەڵان و كۆمەڵێك كەسایەتی دیكەی ئافرەت دەبینرێن. بەڕێوەبەری كارگێڕی بازاڕی داون تاون عەبدولغەفور لەتیف ئەحمەد رایگەیاند كە مانگی داهاتوو بازاڕەكە دەكرێتەوە و وئاماژەی بەوەشكرد كە لە دابینكردنی جێگا بۆ كاسبكارانی دەستگێڕ رەچاوی باری داراییان كراوە. عەبدولغەفور لەتیف ئەحمەد بۆ ئاژانسی ئانادۆڵو گوتی: "ئەم پرۆژەیە یەكێكە لە پڕۆژە گەورەكانی رۆژهەڵاتی ناوەڕاست و لە كۆمەڵێك بەش پێك دێت، یەكێك لەو بەشانە بریتییە لە بازاڕی داون تاون كە ئەم بازاڕەش بۆ خۆی لە چەند بەشێك پێك دێت وەكو بازاڕی زێرینگەری و بەشی ئافرەتان و بەشی پیاوان و كۆمەڵێك لە براندەكانی جیهانی و بەشی رێستورانت و مۆبایل و لەنگە فرۆشی و لەگەڵ ئەوەشدا كۆمەڵێك مێزمان دابین كردووە بۆ دەستگێڕانی ناو شاری هەولێر".
ژمارەی دووكانەكانی ئەم بازاڕە هەشت هەزار دووكانە و بە سێ قۆناغ دەكرێنەوە. قۆناغی یەكەم بریتی بوو لە بازاڕی ئافرەتان كە كراوەتەوە. قۆناغی دووەم یەكی نیسانی داهاتوو دەكرێتەوە و قۆناغی سێیەم كە دوا قۆناغی ئەم بازاڕەیە لە یەكی ئایاری داهاتوودا دەكرێتەوە.
سەبارەت بە تێچوونی بنیاتنانی بازاڕی داون تاوان، عەبدولغەفور لەتیف ئەحمەد گوتی: "تێچووی ئەم بازاڕە زیاتر لە یەك ملیاردۆلارە كە لەسەدا 80ی تەواو بوو".
بڕیارە نهۆمی خوارەوە تایبەت بێ بە لەنگە و میوە فرۆشان و دەستگێڕان، بە تایبەت ئەو دەستگێڕانەی كە ئێستا لە بازاڕی شێخەڵڵا لە ناوەڕاستی شەقامەكان دەبینرێن.
لەبارەی چۆنیەتی پێدانی مێز بەو كەسانەی كە ئێستا لە بازاڕی شێخەڵڵا كاری دەستگێڕی دەكەن، عەبدولغەفور لەتیف ئەحمەد گوتی: "لە رێگای تیرو پشكەوە هەزار و 400 مێز بەسەر كاسبكاراندا دابەش كرا".
دابەشكردن و پێدانی جێگا بە كاسبكاران لە بازاڕی داون تاون بەبێ بەرامبەر دەبێت و بەڕێوەبەری كارگێڕی ئەم بازاڕەش ئاماژە بەوە دەكات کە بۆ جوانتركردنی سیمای شار و نەهێشتی مێزی دەستگێڕی سەر شۆستە و شەقامەكان، پێدانی جێگا بە خۆڕایی دەبێت.
سەبارەت بە پارەی تێچووی دروستكردنی مێزی دەستگێڕان، عەبدولغەفور لەتیف ئەحمەد گوتی: "تێچووی دروستكردنی ئەو مێزانە نزیكەی 5 ملیۆن دۆلارە و بەخۆڕایی دابەش دەكرێت".
بازاڕی داون تاون بەشێكە لە پرۆژەی بازاڕی نیشتمان كە رووبەری پرۆژەكە لەسەر پانتایی 120 هەزار مەتردووجا نیاتنراوە لە ناوجەرگەی شاری ھەولێرە و دەكەوێتە بەرامبەر قەڵای ھەولێر كە مێژووەكەی بۆ زیاتر لە 4 هەزار ساڵ پێش زایین دەگەڕێتەوە.
پرۆژەكە لەلایەن گرووپی كۆمپانیاكانی نێری دیزاین كراوە و بە گوتەی ئەندازیارانی پڕۆژەکە تیایدا بەرزترین ئاستەكانی جێبەجێكردن رەچاو كراوە.
وێڕای دیزاینێكی بیناسازی ھاوچەرخ و باش، کۆی پرۆژەكە بەگەورەترین سەنتەری بازرگانی دادەنرێت لە رۆژھەڵاتی ناوەڕاست و عێراق كە هەشت هەزار شوێنی بازرگانی لە خۆدەگرێت و بەپێی پسپۆرییەكان دابەش كراوە و پاركینگێكی گەورەی ئۆتۆمبێلی تێدا دروست كراوە كە توانای لەخۆگرتنی پێنج هەزار ئوتۆمبێلی هەیە و بەپێی گوتەی بەڕێوەبەری كارگێڕی بازاڕی داون تاون، لە دوو مانگی داهاتوودا سەرجەم كارەكانی تەواو دەبێت و دەست دەكەن بە كردنەوەی بازاڕەكە.
