هەولێر.. کۆگایەکی کۆمیسیۆنی هەڵبژاردنەکانی عێراق ئاگری تێبەربوو

هه‌ولێر-AA

ئاگره‌كه‌ زۆر گه‌وره‌ بوو و تیمه‌كانی ئاگركوژێنه‌وه‌ گه‌یشتنه‌ سه‌ری و كۆنتڕۆڵییان كرد و هیچ زیانێكی گیانی نه‌بووه‌.

پاش نیوه‌ڕۆی ئه‌مڕۆ چوارشەممه‌ و نزیكی كاتژمێر 4، ئاگرێكی گه‌وره‌ له‌ كۆگایه‌كی كۆمیسیۆنی باڵای سه‌ربه‌خۆی هه‌ڵبژاردنه‌كانی عێراق له‌هه‌ولێر گڕی گرت و به‌و هۆیه‌وه‌ سه‌دان سندووق و ئامێری ئه‌لیكترۆنیی ده‌نگدان و ژماره‌یه‌كی زۆر له‌ كاغه‌زه‌كانی ده‌نگدان سووتان.

به‌پرسانی ئاگركوژێنه‌وه‌ و قائیمقامی هه‌ولێر هۆكاری كه‌وتنه‌وه‌ی ئاگره‌كه‌ی ئاشكرا نه‌كرد و باسییان له‌وه‌كرد كه‌ لێكۆڵینه‌وه‌ بۆ زانینی هۆكاره‌كه‌ی ده‌ستی پێكردووه‌.

له‌مباره‌یه‌وه‌ قائیمقامی هه‌ولێر نه‌به‌ز عه‌بدولحه‌مید له‌ لێدوانێكدا بۆ ئاژانسی ئانادۆڵو رایگه‌یاند "هێشتا هۆكاری كه‌وتنه‌وه‌ی ئاگره‌كه‌ روون نییه‌، به‌ڵام ده‌ستكراوه‌ به‌ لێكۆڵینه‌وه‌ له‌ هۆكاره‌كه‌ی و دواتر ئاشكرا ده‌كرێت".

گوتیشی "زیانه‌كان زۆرن و ملیۆنان دۆلار ده‌بێت و ئه‌وه‌ی سووتاوه‌ كه‌لوپه‌له‌كانی كۆمیسیۆنی باڵای سه‌ربه‌خۆی هه‌ڵبژاردنه‌كانه‌".

ده‌یان كارمه‌ندی ئاگركوژینه‌وه‌ و ئۆتۆمبێلی ئاگركوژێنه‌وه‌ له‌ گۆڕه‌پانی كۆگاكه‌ بۆ كۆنتڕۆڵكردنی ئاگره‌كه‌ هه‌موو هه‌وڵێكی خۆیان دا، له‌ كۆتاییدا به‌بێ كه‌وتنه‌وه‌ی هیچ زیانێكی گیانی توانرا ئاگره‌كه‌ كۆنتڕۆڵ بكرێت پاش به‌كارهێنانی شۆفڵ بۆ شكاندنی به‌شێك له‌ دیواره‌كانی كۆگاكه‌ كه‌ هیچ شتێكی تێدا ده‌رنه‌چوو و سه‌رجه‌م كه‌لوپه‌له‌كانی تێیدا سووتان.