هەولێر.. كۆنفڕانسێك له‌سه‌ر مافی ده‌ستكه‌وتنی زانیاریی ده‌به‌سترێت

هه‌ولێر-AA

یاسای مافی ده‌ستكه‌وتنی زانیاریی له‌لایه‌ن ده‌سته‌ی سه‌ربه‌خۆی مافی مرۆڤه‌وه‌ چاودێری جێبه‌جێ كردنی ده‌كرێت و له‌ چه‌ند شوێنێكدا به‌ پاساوی پاراستنی ئاسایشی نه‌ته‌وه‌یی و دابونه‌ریتی گشتی پێدانی زانیاریی قه‌ده‌غه‌كردووه‌.

ئەمڕۆ شه‌ممه‌ رێكخراوی ئاشتی و ئازادی كۆنفڕانسێكی له‌شاری هه‌ولێر له‌باره‌ی یاسای مافی ده‌ستكه‌وتنی زانیاری له‌هه‌رێمی كوردستان-عێراق رێكخست كه‌ ئاژانسی ئه‌مریكی بۆ په‌ره‌پێدانی نێوده‌وڵه‌تی پاڵپشتیی دارایی ده‌كات، مه‌به‌ست له‌ وۆركشۆپه‌كه‌ش باسكردن بوو له‌و یاسایه‌ كه‌ له‌ساڵی 2013 له‌ هه‌رێمی كوردستان ده‌رچووه‌ و چه‌ندین لایه‌نی ئه‌رێنی و نه‌رێنیشی تێدایه‌ و له‌و كۆنفڕاسه‌ هه‌ردوو رووه‌كه‌ی خرانه‌ روو.

توێژه‌ر و یه‌كێك له‌ قسه‌كه‌ره‌كانی ئه‌و كۆنفڕانسه‌ جیهاد كامل له‌وباره‌یه‌وه‌ به‌ ئاژانسی ئانادۆڵوی راگه‌یاند "ئێمه‌ وه‌كو رێكخراوی ئاشتی و ئازادی له‌چوارچێوه‌ی پڕۆژه‌ی ته‌كامول كه‌ ئاژانسی USAID ی ئه‌مریكی پشتگیریی ده‌كات له‌ پڕۆژه‌یه‌كی سێ مانگیدا هه‌ڵساوین بۆ به‌داداچوون و هه‌ڵسه‌نگاندن بۆ ئاستی جێبه‌جێكردنی یاساكه‌، یاساكه‌ له‌ساڵی 2013 ده‌رچووه‌ و هاووڵاتییان ده‌ست كراوه‌ ده‌كات بۆ ئه‌وه‌ی ده‌ستییان بگاته‌ زانیاریی، جۆرێك له‌ كه‌ش له‌بار ده‌كات بۆ گه‌یشتن به‌زانیاریی و ئه‌مه‌ش وا ده‌كات شه‌فافییه‌ت و دیموكراسی باشتر بچه‌سپێت، به‌ڵام هێشتا یاساكه‌ له‌ رۆژنامه‌ی وه‌قائیع بڵاونه‌كراوه‌ته‌وه‌، ده‌مانه‌وێ كار بكه‌ین بۆ ئه‌وه‌ی ئه‌و یاسایه‌ رێنمایی بۆ ده‌ربكرێت و حكوومه‌ت په‌له‌ بكات له‌وه‌ی كه‌ یاساكه‌ جێبه‌جێ بكرێت و زانیارییه‌كان بگه‌نه‌ ده‌ستی هاووڵاتییان".

ئه‌و توێژه‌ره‌ له‌ درێژه‌ی قسه‌كانیدا گوتیشی "ئێمه‌ پێشنیازمان كردووه‌ له‌ پرۆگرامه‌كانی خوێندن جێی ئه‌م یاسایه‌ بكرێته‌وه‌ بۆ ئه‌وه‌ی خه‌ڵك پێی بزانێت و رابێت له‌سه‌ر داواكردن و ده‌ست گه‌یشتنی به‌زانیاریی".

هه‌روه‌ها روونیشی كرده‌وه‌ "چه‌ند شتێك له‌ یاساكه‌ هه‌یه‌ ده‌بێت روون بكرێته‌وه‌، به‌ نموونه‌ پرسی ئاسایشی نه‌ته‌وه‌یی و نیشتمانی ده‌بێت رێنمایی بۆ ده‌ربكرێت و بزانین چی ئاسایشی نه‌ته‌وه‌ییه‌، چی دابونه‌ریت و ئه‌و شتانه‌یه‌".