نۆ کەس لە شه‌ڕی نێوان ھۆزەکان لە باشووری بەغدا کوژران

بەغدا - AA

لە ئاکامی شەڕ و پێکدادانی نێوان ھۆزەکان لە ناوچەی دۆرەی باشووری بەغدا نۆ کەس کوژران و پێنجی دیکەش برینداربوون.

ئەفسەر لە پۆلیسی عێراقی بە ناوی ئەحمەد خەلەف لە لێدوانێکیدا بۆ ئاژانسی ئانادۆڵو رایگەیاند کە "لە ئاکامی شەڕ و پێکدادانی ھۆزەکان لە باشووری بەغدا نۆ کەس کوژران و ٥ی دیکەش برینداربوون".

خەلەف ئاماژەی بەوەشدا کە لە شەڕ و پێکدادانەکەدا چەکی سوک و مام ناوەند لە ناوچەی زەبورەی سەربە دۆرە بەکارھاتووە.

ناوبراو روونیشی کردەوە کە ھێزەکانی ئەمنی کۆنترۆڵی ناوچەکەیان کردووە و دەستیان بە لێکۆڵینەوە کردووە بێ ئەوەی ھۆکاری شەڕ و پێکدادانەکە ئاشکرا بکرێ.

بەشێکی پارێزگاکانی عێراق بەدەست شەڕ و پێکدادانەکانی ھۆزەکان تا ئێستاش دەناڵێنن و حکوومەتیش بە رێگەی ئاشتکردنەوە چارەسەری کێشەی نێوان ھۆزەکان دەکات.