سلێمانی - AA
خوێندکارانی پەیمانگای تەکنیکیی سلێمانی، خۆپیشاندانێکیان رێکخست و لە میانیدا داوای گێرانەوەی دەرماڵەکانیان کرد.
ئەمڕۆ ٢١ی تشرینی دووەمی ٢٠٢١ لە شاری سلێمانی، کۆمەڵێک لە خوێندکارانی پەیمانگای تەکنیکیی سلێمانی گردبوونەوەیەکیان ئەنجام دا و دواتر شەقامی سەرەکی مەلیک مەحمودیان بەڕووی هاتوچۆدا بۆ ماوەی یەک کاتژمێر و ٣٠ خولەک داخست.
خوێندکاری پەیمانگای تەکنیکیی سلێمانی لە بەشی پەرستاری، سندوس رەحمان بۆ ئاژانسی ئانادۆڵو، سەبارەت بە خۆپیشاندان و گردبوونەوەکەیان گوتی: "ئێمە وەک خوێندکارانی پەیمانگای تەکنیکیی سلێمانی بەناوی سەرجەم خوێندکارانی زانکۆ و پەیمانگاکانەوە، هاتووینەتە سەرشەقام بۆ داواکردنی مافێکی سەرەتایی خۆمان کە پێدانی دەرماڵەکانمانە و بۆ ماوەی چەند ساڵێکە بە ناڕەوا لێمان بڕاوە، ئێمە بەردەوام دەبین لەسەر داواکردنی مافەکانمان تا ئەو کاتەی حکوومەت و وەزارەتی خوێندنی باڵا دێنە سەرهێڵ بۆ دابینکردنی داواکانمان لە پێدانی دەرماڵەکانمان".
ماوەی چەند ساڵێکە دەرماڵەی خوێندکارانی زانکۆ و پەیمانگاکان بەهۆی قەیرانی دارایییەوە بڕاوە و ئێستاش خوێندکاران بەمەبەستی پێدانی ئەو دەرماڵانەیان کە بە بڕی جیاواز دەبەخشرایە خوێندکارانی ناوخۆ و دەرەوەی شارەکان کە لە پەیمانگا و زانکۆکانی هەرێم دەوامیان دەکرد، زۆرێک لە خوێندکارانی پەیمانگاکان و زانکۆکان لە هەریەک لە پارێزگاکانی سلێمانی، هەڵەبجە و ئیدارە سەربەخۆکانی راپەڕین و گەرمیان رۆژانە خۆپیشاندان و گردبوونەوەی ناڕەزایەتی ئەنجام دەدەن و هەندێک جار شەقامە سەرەکییەکانی شارەکان دەگرن و بەڕووی هاتوچۆدا دایدەخەن.
