ئه‌نجامه‌كانی رووپێوی هه‌ڵسه‌نگاندنی بازاڕی كار و شیكردنه‌وه‌ی كارامه‌ییه‌كان راگه‌یه‌ندرا

هه‌ولێر - AA

ئامانج له‌ پڕۆژه‌كه‌ بریتییه‌ له‌ گه‌شه‌پێدانی خوێندنی پیشه‌یی و ته‌كنكیكی له‌ پێناو گونجاندیان له‌گه‌ڵ بازاڕی كار و پێویستییه‌كانی.

به‌یانی ئه‌مڕۆ دووشه‌ممه‌ رێوڕه‌سمی راگه‌یاندنی ئه‌نجامه‌كانی رووپێوی هه‌ڵسه‌نگاندنی بازاڕی كار و شیكردنه‌وه‌ی كارامه‌ییه‌كانی تایبه‌ت به‌ عێراق و هه‌رێمی كوردستان له‌ هۆڵی هۆتێل دیڤان له‌ شاری هه‌ولێر به‌ڕێوه‌چوو.
له‌و رێوڕه‌سمه‌دا كه‌ چه‌ند وه‌زیرێكی حكوومه‌تی هه‌رێمی كوردستان و ژماره‌یه‌ك له‌ كۆنسوڵ و به‌رپرسانی رێكخراوه‌ نێوده‌وڵه‌تییه‌كان ئاماده‌ی بوون چه‌ند ئامار و داتایه‌كی نێو رووپێوییه‌كه‌ خرانه‌ روو كه‌ هه‌شت بوار له‌خۆ ده‌گرێت.

رووپێوییه‌كه‌ هه‌ردوو وه‌زاره‌تی پلاندانانی عێراق و هه‌رێمی كوردستان له‌رێگه‌ی ده‌زگای ئاماره‌كانییانه‌وه‌ و به‌ پاڵپشتیی رێكخراوی یونسكۆ و یه‌كێتی ئه‌ورووپا ئه‌نجامییان داوه‌ بریتییه‌ له‌ هه‌ڵسه‌نگاندنی بازاڕ و هه‌شت بوار له‌ خۆ ده‌گرێت.

به‌ڕێوه‌به‌ری پڕۆژه‌ی چاكسازی خوێندنی ته‌كنیكی راهێنانی پیشه‌یی له‌ فه‌رمانگه‌ی یونسكۆی عێراق رۆبێر چاو له‌لێدوانێكدا بۆ ئاژانسی ئانادۆڵو له‌وباره‌یه‌وه‌ روونی كرده‌وه‌ "ئه‌مڕۆ ئه‌نجامه‌كانی رووپێوی بازاڕی كارمان راگەیاند كه‌ بریتییه‌ له‌ كارامه‌ییه‌كانی بازاڕی كار به‌مه‌به‌ستی ئه‌وه‌ی زانیاریی بخه‌ینه‌ به‌رده‌ست به‌رپرسانی فێركردنی ته‌كنیكی بۆ ئه‌وه‌ی كه‌سانی شاره‌زا به‌رهه‌م بهێنن ئه‌وانه‌ی كه‌ بازاڕی كار پێویستی پێیانه‌".

هه‌روه‌ها گوتیشی "شێوازی دامه‌زراندن و ده‌ستخستنی كار جیاوازه‌ ئێستا، خاوه‌نكارانی ئێستا به‌دوای شاره‌زایی جیاوازتر له‌ جاران ده‌گه‌ڕێن، بۆ نموونه‌ له‌ كۆنگره‌ی ئابووریی جیهانی پێشبینی ده‌كات 65 له‌سه‌دی ئه‌و منداڵانه‌ی ئه‌مساڵ چوونه‌ته‌ به‌رخوێندن له‌ پسپۆڕییه‌ك شاره‌زا ده‌بن كه‌ جیاوازه‌ له‌و پسپۆڕییانه‌ی ئێستا هه‌یه‌، هۆكاری ئه‌مه‌ش ته‌كنه‌لۆژیا و پێویستی بۆ شاره‌زایی و لێهاتوویی دیكه‌، بۆیه‌ له‌م رووپێوییه‌ له‌سه‌ر ئه‌وه‌ ده‌وه‌ستین كه‌ بواره‌كان چی شاره‌زای و لێهاتوویان ده‌وێت".

به‌ڕێوه‌به‌ری پڕۆژه‌ی چاكسازی خوێندنی ته‌كنیكی راهێنانی پیشه‌یی له‌ فه‌رمانگه‌ی یونسكۆی عێراق رۆبێر چاو له‌درێژه‌ی قسه‌كانیدا گوتی "رووپێوییه‌كه‌ حه‌وت كه‌رتی گشتی و كه‌رتێكی تایبه‌تی گرته‌وه‌ و قسه‌ له‌گه‌ڵ 2600 خاوه‌ن كار كراوه‌ سه‌باره‌ت به‌و پرسه‌ و هه‌موو عێراقی گرتووه‌ته‌وه‌".

هه‌روه‌ها گوتیشی "كه‌رته‌كان بریتی بوون له‌ كشتوكاڵ، گه‌شتیاری، گواستنه‌وه‌، بونیادنان، فرۆشتن به‌ پارچه‌ و گه‌یاندن و هی دیكه‌ش، هه‌ر كه‌رتێك راپۆرتێكی 90 لاپه‌ڕیی له‌سه‌ر ئاماده‌كراوه‌ و زانیاریی زۆردی له‌سه‌ر بازاڕی كار له‌ عێراق تێدایه‌، پێشبینی ده‌كه‌م زانیارییه‌كان زۆر به‌سوود بن بۆ عێراق".

به‌پێی راگه‌یه‌ندراوی رۆژنامه‌وانیی یونسكۆ مه‌به‌ست له‌م رووپێوییه‌ ئه‌وه‌یه‌ كه‌ لێهاتووی و كارامه‌ییه‌كان شیبكاته‌وه‌ كه‌ یه‌كێكه‌ له‌ پڕۆژه‌كانی چاكسازیی خوێندن و مه‌شقی ته‌كنكیكی و پیشه‌یی و پاش ئه‌وه‌ ئه‌م كه‌رته‌ به‌ره‌و پێشه‌وه‌ بچێت له‌رێگه‌ی پرۆگرامی نوێ كه‌ وا بكات توانای مرۆیی شاره‌زاتر به‌رهه‌م بهێنێت به‌تایبه‌ت له‌وانه‌ی له‌ بواری خوێندنی پیشه‌یی و ته‌كنكیكی به‌رده‌وامی به‌خوێندن ده‌ده‌ن.