Hemn Baban
25 ئاب 2019•نوێکردنەوە: 26 ئاب 2019
ھەولێر - AA
ئەندامی مەکتەبی سیاسیی یەکێتیی نیشتمانیی کوردستان، عەدنان موفتی بەدووری دەزانێت کە خۆی بۆ سەرکردایەتی یەکێتی کاندید بکاتەوە و باس لە بردنەپێشەوەی گەنجان دەکات.
عەدنان موفتی لە کۆنگرەیەکی رۆژنامەوانییدا کە ئەمڕۆ یەکشەممە بەستی تیشکی خستە سەر چەند پرسێک، لەنێویاندا ھەوڵەکانی حزبەکەی بۆ بەستنی کۆنگرەی سێیەمی خۆی کە بڕیارە تا کۆتایی ئەمساڵ سازی بکات.
ئهندامی مهكتهبی سیاسیی یهكێتیی نیشتمانیی كوردستان، عهدنان موفتی لەوبارەیەوە لە پەراوێزی بەشداریکردنی لە کۆڕبەندی سەرکردایەتی لە ھەولێر کە ئەمڕۆ یەکشەممە دەستی بەکارەکانی کرد، بۆ دەزگاکانی راگەیاندن گوتی: "ئەو پرسە دەمێکە موناقەشە دەکرێت، بڕیارە لەمڕۆژانەی داھاتوو سەرکردایەتی یەکێتیی نیشتمانیی کوردستان کۆببێتەوە و بڕیاری کۆتایی لەوبارەیەوە بدات، چاوەڕوان دەکرێت پێش کۆتایی ئەمساڵ یەکێتی کۆنگرەی خۆی ببەستێت".
ئەو گوتیشی: "کۆنگرەی یەکێتی وەکو کۆنگرەی حزبەکانی دیکەش قۆناغێکی گرنگە و گۆڕانکارییەکی زۆر روویداوە، چەند ساڵێکی زۆری بەسەر تێپەڕیوە کە پێنج شەش ساڵێک دەبێت، بەتایبەت کۆنگرەی دوای مام جەلال-یشە، پێویستە لایەنەکانی نێو یەکێتی بەھەستکردن بەلێپرسراوێتی کاری باش بکەن بۆ ئەوەی کۆنگرەیەکی سەرکەوتووبێت و چارەسەری کێشەکان بکات و سەرکردایەتییەکی نوێ ھەڵبژێردرێت".
ئهندامی مهكتهبی سیاسیی یهكێتیی نیشتمانیی كوردستان، عهدنان موفتی سەبارەت بە وەڵامی پرسیارێکی ئاژانسی ئانادۆڵو لەمەڕ پۆستی سکرتێری گشتیی یەکێتیی نیشتمانیی کوردستان گوتی: "ئەوە کۆنگرە بڕیاری لێوە دەدات".
عهدنان موفتی دەربارەی خۆ کاندیدکردنەوەشی بۆ پۆستی سەرکردایەتی لە ریزەکانی یەکێتیی نیشتمانیی کوردستان گوتی: "قۆناغی داھاتوو قۆناغی گەنجە، حەزەکەم خوێنی تازە بێتە نێو یەکێتییەوە، پێویستە گەنجان بێنە پێشەوە بۆ سەرکردایەتی یەکێتی".
ئەو ئەندامەی مەکتەبی سیاسی یەکێتیی نیشتمانیی کوردستان سەبارەت بە دانانی پارێزگارێک بۆ کەرکووک و دواکەوتنی ئەو پرسە گوتی: "پرسی دانانی پارێزگاری کەرکووک بەندە بە ئەنجوومەنی پارێزگای کەرکووکەوە، یەکێتیی نیشتمانیی کوردستان و پارتی دیموکراتی کوردستان رێککەوتوون لەسەر کاندیدێک، بەڵام پێویستە راوێژ لەگەڵ لایەنەکانی دیکەی کەرکووک بکرێت بۆ ئەوەی یەکلایی بکرێتەوە، گفتوگۆکان لەوبارەیەوە لەگەڵ لایەنەکان بەردەوامن".
عهدنان موفتی سەبارەت بە بوونی کێشە لە نێوان یەکێتی و پارتی لەسەر ئەو رێککەوتنەی پێش پێکھێنانی کابینەی نۆیەمی حکوومەتی ھەرێم ئەنجامدرابوو رایگەیاند "من نەمبیستووە ھیچ ناکۆکییەک لەوبارەیەوە ھەبێت، ئەگەر ناکۆکییەک ھەبێت لە لایەن کەسێکەوە یان ئەندامێکی پارێزگا یان ئەندامێکی یەکێتی یان پارتی ھەیە، بەڵام ئەوەی ھەیە رێککەوتن لە نێوان یەکێتی و پارتی ھەیە و دەبێت جێبەجێ بکرێت".
ئهندامی مهكتهبی سیاسیی یهكێتیی نیشتمانیی كوردستان، عهدنان موفتی دەربارەی ھەڵبژاردنی پارێزگاکان بە پارێزگاری کەرکووک-یشەوە گوتی: "ماددەی ١٤٠ی دەستووری عێراق بەڕوونی باسی لێوەدەکات و ناکرێت وەکو پارێزگاکانی دیکە بێت، بەتایبەت رووداوەکانی ئەم دووساڵەی رابردوو ئەو گۆڕانکارییانەی بەمدواییە لەو ناوچانە کراوە، دەبێت ئاساییکردنەوەی بارودۆخی کەرکووک و ناوچەکان جێبەجێ بکرێت، پێویستیشە لایەنە کوردستانییەکان لەسەر ئەم پرسە رێکبکەون و کەرکووک و ئەو ناوچانە لەسەروو ناکۆکییەکانییانەوە بێت".
عهدنان موفتی لەمەڕ یەک لیستی لایەنە کوردستانییەکانیش بۆ ھەڵبژاردنەکانی پارێزگای کەرکووک و ناوچە کێشە لەسەرەکانی دیکەش روونیکردەوە "یەک لیستی گرنگە، لەبەر ئەوەی کەرکووک نە ھەولێرە نە سلێمانی-یە، کەرکووک ناوچەیەکە دابڕاوە لە ھەرێمی کوردستان، ھەمووان ئاواتییانە کەرکووک و ناوچەکانی دیکەش بگەڕێنەوە بۆسەر کوردستان، بۆیە دەبێت یەک لیست بین و ئەمە پێویستە کە ھاوپەیمان بین، ئەگەر نەشکرێت لەوێ یەک لیست بین، نابێت لەوێ ناکۆک بین و ململانێیەکان رووبەڕووی یەکتر بکەینەوە".
ئهندامی مهكتهبی سیاسیی یهكێتیی نیشتمانیی كوردستان، عهدنان موفتی ھەروەھا گوتی: "پێویستە دیالۆگ لەگەڵ تورکمان و عەرەبیش لە کەرکووک بکرێت، دەبێت گەرەنتییان پێ بدرێت مافەکانیان پارێزراو دەبێت، ئەمە دەبێت لەسەر ئاستی ھەرێمی کوردستان و عێراقیش ھەبێت، دەبێت ئەو گەرەنتییە بدرێت کە مەبەستمان لە سەپاندنی ئیرادەنییە، بەڵکو بۆ ئەوەیە کە دەستوور جێبەجێ بکرێت و لە دەستووریشدا باس لە ئاساییکردنەوەی بارودۆخ و گەڕانەوەی خەڵک بۆ ناوچەکانی خۆیان بێتە کایەوە".
