سوپای عێراق: "تەنها هێزەكانمان لە بنكەی تاجی جێگیركراون"

هەولێر ــ AA

فەرماندەیی ئۆپەراسیۆنە هاوبەشەكانی عێراق رەتی كردەوە كە جگە لە هێزەكانی عێراق، هیچ هێزێكی دیكە لە بنكەی تاجی باكووری بەغدا جێگیركرابن.

لەمبارەیەوە گوتەبێژی فەرماندەیی ئۆپەراسیۆنە هاوبەشەكانی عێراق، لیوا تەحسین خەفاجی لە لێدوانێكی رۆژنامەوانییدا گوتی: "هەندێك میدیا و ئاژانسەكانی هەواڵ، هەواڵ ئەوەیان بڵاوكردووەتەوە كە گوایە سەربازانی سعوودیە بنكەی ئاسمانی تاجی-یان جێهێشتووە، بۆیە بۆ رای گشتیی رایدەگەینن كە ئەو هەواڵە دوورە لە راستییەوە".

راشیگەیاند، ئەو هێزانەی كە ئێستا لە بنكەی تاجی جێگیر کراون، تەنها هێزەكانی عێراقین و گوتی: "پێشتر هێزەكانی هاوپەیمانیەتی نێودەوڵەتی دژبە داعش لە بنكەی تاجی جێگیركرابوون، بەڵام هەفتەی رابردوو ئەو بنكەیە رادەستی هێزەكانی عێراق كرایەوە".

گوتەبێژی فەرماندەیی ئۆپەراسیۆنە هاوبەشەكانی عێراق، لیوا تەحسین خەفاجی رەتی كردەوە كە جگە لە هێزەكانی عێراق، هیچ هێزێكی دیكە لەئێستادا لە بنكەی تاجی جێگیركرابن و داواشی لە میدیاكان كرد كە وردبین بن لە گواستنەوە و بڵاوكردنەوەی زانیارییەكان.

رۆژی یەكشەممەی هەفتەی رابردوو هێزەكانی هاوپەیمانیەتی نێودەوڵەتی دژبە داعش لە بنكەی تاجی باكووری بەغدا كشانەوە و بنكەكەیشیان رادەستی هێزە عێراقییەكان كردەوە.

لای خۆیەوە فەرماندەیی ئۆپەراسیۆنە هاوبەشەكانی عێراق رایگەیاندبوو ئەو هێزانەی هاوپەیمانیەتی نێودەوڵەتی دژبە داعش كە تا ئێستا لە هەشت بنكەی سەربازی كشاونەتەوە، دووبارە لە عێراق بڵاوناكرێنەوە.

ماوەی چەند مانگێكە هاوپەیمانییەتی نێودەوڵەتی دژبە داعش دەستیكردووە بە چۆڵكردنی بنكەكانیان لە عێراق، هاوكات بەرپرسانی ئەمریكا رایانگەیاندووە كە چۆڵكردنی ئەو بنكانە، مەبەسیت لێی، رێكخستنەوەی هێزەكانی هاوپەیمانییەتی نێودەوڵەتی دژبە داعشە لە عێراق .