حکوومەتی ھەرێمی کوردستان ئیدانەی ھێرشە کیمیاییەکەی ئیدلب دەکات

ھەولێر-AA
حکوومەتی ھەرێمی کوردستان، لە راگەیەندراوێکدا، ئیدانەی ھێرشە کیمیاییەکەی خان شەیخۆن سەر بە پارێزگای ئیدلبی سووریا دەکات و دەڵێت: "ئازارەکانی ھەڵەبجەی بەبیر ھێناینەوە".
لە راگەیەندراوەکەی حکوومەتی ھەرێمی کوردستان کە لە ماڵپەری فەرمی حکوومەت بڵاوکراوەتەوە ھاتووە "دەربارەی بەکارھێنانی چەکی کیمیایی لە سووریا، ئـەنجوومەنی وەزیرانی ھەرێمی کوردستان وێڕای ئـیدانەکردنی ئـەو تاوانە، سەرەخۆشی لە کەسوکاری قوربانیەکان دەکات".
ھەروەھا دەربارەی بەکارھێنانی چەکی کیمیایی لە سووریا، حکومەتی ھەرێمی کوردستان رایدەگەیێنێ "گەلی کوردستان نەھامەتییەکی زۆری بەدەست رژێمی بەعسی ڕووخاوەوە بینیوە و یەکێک لە نەھامەتییە ھەرە گەورەکانیش، کارەساتی کیمیابارانکردنی ھەڵەبجە بوو کە لە چەند چرکەیەکدا پێنج ھەزار کەسی کردە قوربانی. ئەگەر ئەو کات کۆمەڵگەی نێودەوڵەتی بێدەنگییان ھەڵنەبژاردبا و ھەنگاوی پێویستیان بگرتبایەتە بەر، دەکرا ببوایە ھۆکارێک تا ئەم جۆرە تاوانە نامرۆڤانانە دووبارە نەبنەوە".
لە بەشێکی راگەیەندراوەکەدا ھاتووە: "لە چەند ڕۆژی رابردوودا بینیمان لە سووریا چەکی کیمیایی لە دژی خەڵکی سڤیلی شاری ئیدلب بەکار ھێنرا، ئەم تاوانە ھەموو ئەو برینانەی بەبیر ئێمە ھێنایەوە کە لە کۆتایی ھەشتاکانی رابردوو دژ بە گەلی کورد ئەنجام درا. بە توندی ئـەو تاوانە ئـیدانە دەکەین و ھاوخەمی و ھاوسۆزیی خۆمان بۆ کەسوکاری قوربانیانی ئەو کردەوە نامرۆڤانەیە دەردەبڕین".
ھەروەھا حکومەتی ھەرێمی کوردستان بەپێویستی دەزانێت کۆمەڵگەی نێودەوڵەتی بۆ رێگریکردن لە دووبارەبوونەوەی ئەو تاوانانە، ھەڵوەستەیەکی جددی بکات و ھیوادەخوازێت ئەو ھەنگاوەی بۆ رێگرتن و وەڵامدانەوەی ئەو جۆرە کردەوە نامرۆڤانە لەلایەن ھێزەکانی ئەمەریکاوە نراوە، ببێتە ھۆکارێک تاکو تاوانی لەو جۆرە دووبارە نەبێتەوە و لە ھەمان کاتیشدا بە جددی ھەوڵ بدرێت ڕێگەچارەیەکی بنەڕەتی بۆ ئەو ئاڵۆزی و بارودۆخە ناھەموارەی کە رۆژھەڵاتی ناوەڕاستی گرتۆتەوە، بدۆزرێتەوە.