یووتیووب پەخشی کەناڵەکانی RT و Sputnik لە ئەورووپا داخست

واشنتۆن – AA

کۆمپانیای گووگڵی ئەمریکی، رایگەیاند بە مەبەستی "رێگرتن لە بڵاوکردنەوەی بانگەشە و ھەواڵی نادرووست" لە شەڕی رووسیا – ئۆکراینا، پەخشی کەناڵی یووتیووبی دەزگای مێدیایی (RT) و (Sputnik)ی سەربە دەوڵەتی رووسیایان لە ئەورووپا داخستووە.

کۆمپانیا زەبەلاحەکانی تەکنەلۆجیا، بۆ رێگرتن لە بانگەشە و بڵاوکردنەوەی ھەواڵی نادرووست بەردەوامن لە گرتنەبەری ھەنگاوی جۆراوجۆر.

لەو راگەیاندراوەی کە لە کۆمپانیای گووگڵەوە بڵاوکراوەتەوە، ئاماژە بەوە کراوە کە پەخشی کەناڵی یووتیووبی (RT) و (Sputnik)ی سەربە دەوڵەتی رووسیا لە ئەورووپا قەدەغەکراوە.

لەلایەکی دیکەوە، پلاتفۆرمی تیک تۆکی چینی بۆ بڵاوکردنەوەی ڤیدیۆ، ھەنگاوێکی ھاوشێوەی نا و ئەو پەخشی ئەو کەناڵانەی لە ئەورووپادا داخست.