پەیامی سەرۆکی ھەرێمی کوردستان لە یادی ئەنفالدا

هه‌ولێر- AA

سەرۆکی ھەرێمی کوردستان، نێچیرڤان بارزانی لە پەیامێکدا بەبۆنەی یادی ٣٢ ساڵەی ئەنفال و جینۆسایدکردنی گەلی کورد لەلایەن رژێمی پێشووی عێراقدا، ئاماژە بەوە دەکات کە دەبێت ھەموو ھەوڵێکمان بۆ ئەوە بێت کە بە ‌ھیچ شیوەیەک رێگە نەدرێت جارێکی دیکە نە گەلی کوردستان و نە ھیچ گەل و میللەتێکی دیکەی سەرزەمین، رووبەڕووی ئەو تاوانکاری و جینۆسایدە ببنەوە.

لە پەیامەکەی سەرۆکی ھەرێمی کوردستان نێچیرڤان بارزانی دا ھاتووە: ''لە یادی ٣٢ ساڵەی شاڵاوە بەدناوەکانی ئەنفالدا، بەڕێز و شکۆوە ھەموو ئەو قوربانییانە بەبیر دەھێنینەوە کە لەو تاوانکاری و جینۆسایدەدا گیانیان بەخشی و، سەری رێز و نەوازش لەبەردەم گیانی پاکی ئەوان و تەواوی شەھیدانی کوردستان دادەنوێنین''.

لە بەشێکی دیکەی پەیامەکەدا ھاتووە: ''ئەنفال یەکێک لە سامناکترین و دڕەندەترین تاوانەکانی مێژووە کە ئافرەت، پیاو، منداڵ و پیری نەناسیووە و بێباکانە ھەمووانی پێکەوە بەرەو مەرگی بەکۆمەڵ راپێچ کردووە، ھەروەھا ژینگە و ئاوەدانی تەخت کردووە و ھەموو شوێنەوارێکی ژیانی سڕیووەتەوە. ئەو سیاسەتە رەگەزپەرەستەی بەعس بووە ھۆی ئەوەی تەنیا لە شاڵاوەکانی ئەنفالدا زیاتر لە ١٨٠ ھەزار ھاووڵاتیی کوردستان گیانیان سپارد و کۆمەڵکوژ و زیندەبەچاڵکران، جگە لە وێرانکردنی ھەزاران دێھات و دەیان شارۆچکەی کوردستان''.

سەرۆکی ھەرێمی کوردستان لە پەیامەکەیدا ئاماژە بەوەش دەکات کە دەبێت ھەموو ھەوڵەکان بۆ ئەوەبن جارێکی دیکە ھیچ میللەتێک رووبەڕووی ئەم تاوانکارییە نەبێتەوە و تیاییدا ھاتووە: ''لە کاتێکدا ئەمڕۆ یادی ئەو ئازیزانە و تەواوی شەھیدانی کوردستان دەکەینەوە، دەبێت ھەموو ھەوڵێکمان بۆ ئەوە بێت کە بە ‌ھیچ شیوەیەک رێگە نەدرێت جارێکی دیکە نە گەلی کوردستان و نە ھیچ گەل و میللەتێکی دیکەی سەرزەمین، رووبەڕووی ئەو تاوانکاری و جینۆسایدە ببنەوە، دەبێت دەوڵەتی عێراقیش وەک ئەرکی یاسایی و ئەخلاقیی خۆی، ئاوڕێکی جددی لە کەسوکاری قوربانییان بداتەوە و قەرەبوویان بکاتەوە''.

سەرۆکی ھەرێمی کوردستان ئەوەیشی خستووەتەڕوو کە؛ ''وەکچۆن دادگای باڵای تاوانەکانی عێراق ئەنفالەکانی بە جینۆساید و تاوانی دژی مرۆڤایەتی و تاوانی جەنگ ناساند، داواکارین کۆمەڵگەی نێودەوڵەتیش ئەو تاوانکارییانە بە جینۆساید بناسێنێت، لەم پێناودا بەردەوام دەبین و ھەموو ھەوڵێکمان دەخەینە گەڕ، ھەروەھا بەردەوام دەبین بۆ دۆزینەوەی رووفاتی شەھیدان و گێڕانەوەیان بۆ ئامێزی نیشتمان''.‌