مه‌سروور بارزانی: "چاوه‌ڕوان بوون حكوومه‌تی عێراق یارمه‌تیی زیاتری كه‌مپه‌كان بدات"

ھەولێر-AA
مەسروور بارزانی دەڵێت کە رێگەنەدراوە دەزگای خێرخوازی بارزانی ھاوکارییەکانی بگەیەنێتە قوربانییانی بوومەلەرزەکەی ئەمدواییەی ناوچەکانی ئێران.
ئەمڕۆ دووشەممە لە کۆنفڕانسی ساڵانەی دەزگای خێرخوازی بارزانی، راوێژکاری ئەنجوومەنی ئاسایشی ھەرێمی کوردستان، مەسروور بارزانی وتارێکی پێشکەش کرد و تیایدا تیشکی خستە سەر بەشێک لە کارەکانی ئەو دەزگایە، ھەروەھا باسی لە کەمتەرخەمییەکانی حکوومەتی عێراقیش بەرامبەر بە ئاوارەکان کرد بەتایبەت ئەو ئاوارانەی بەشی ھەرە زۆریان لە ھەرێمی کوردستانن.
مەسروور بارزانی گوتی: "دەزگای خێرخوازی بارزانی خاوەن فەلسەفەیەکە کە لە فەرموودەیەکی بارزانی سەرچاوەی وەرگرتووە ئەویش ئەوەیە کە دەفەرموێت 'شانازییە بۆ مرۆڤ خزمەتکاری میللەتەکەی خۆی بێت'، جەنابی بارزانی نەمر لە ھەموو تەمەنی خۆیدا ھەوڵی دا خزمەت بە گەل و وڵاتەکەی خۆی بکات، خزمەت بە مرۆڤایەتی بکات، دوای ئەویش ئێمەش ھەستمان بەوەکرد کە ئەرکێکی ئێمەیە درێژەپێدەری رێبازی ئەو مرۆڤە مەزنە بیین و دەزگایەک بە ناوی بارزانی نەمر کە شایستەی خزمەت و خەباتی جەنابی بارزانی بێت و لە خزمەتی خەڵکی کوردستاندا بێت دابمەزرێنین، ھەر ئەمەش بووە ھۆکار کە لەژێر فەرمان و رێنمایی بەڕێز جەنابی سەرۆک بارزانی لە ساڵی ٢٠٠٥ دەزگای خێرخوازی بارزانی-مان دامەزراند، بەو ھیوایەی کە ئەم دەزگایە بێت بە سەکۆیەک، بە پلاتفۆرمێک، بە ماڵێک بۆ ھەموو ئەو کەسانەی پێویستییان بە یارمەتی ھەیە، پێم وایە مرۆڤ ئەو کاتە دەتوانێت ھەست بە ئارامی و ئاسوودەیی بکات کە ھیچ مرۆڤێکی تر لە دەردی نەبوونی و ھەژاری نەناڵێنێت، دەزگای خێرخوازی بارزانی باوەشی بۆ ھەموو ئەو کەسانە کردووەتەوە کە لە ترسی تیرۆر و ھەڕەشەی کوشتن شوێنەکانی خۆیان بەجێ ھێشتووە و روویان کردووەتە کوردستان. لە دەردی بێ دادی و بێ خزمەتی شار و شارۆچکە و دێھاتەکانی خۆیان بەجێھێشتووە و روویان کردووەتە کوردستان. لە نەبوونی ئازادی روویان لە کوردستان کرد تاوەکو بە ئازادی بژیین. لە ژێر فشاری زوڵم و ستەم رایانکرد و کوردستانیان بە پەناگەیەکی سەقامگیر بۆخۆیان زانی و ھاتنە ئێرە، بۆیەش دەزگای بارزانی باوەشی کراوەیە بۆ ھەموو ئەو ئازیز و لێقەوموانانە و ئەو خەڵکەشی کە پێویستییان بە ھاوکاری و یارمەتی ھەیە".
راوێژکاری ئەنجوومەنی ئاسایشی ھەرێمی کوردستان لەدرێژەی وتارەکەیدا لەبەردەم ئامادەبووان کە جگە لە سپۆنسەرانی دەزگاکە لە نوێنەرانی کۆمپانیا و دامەزراوە نێوخۆیی و نێودەوڵەتییەکان، ھاوکات چەندین کۆنسول و سیاسەتمەداریش ئامادەی ئەو رێوڕەسمە بووبوون گوتی: "دەزگای بارزانی بەھانای ھەموو ئەو خەڵکانەوە دەچێت کە پێویستییان بە بەسەرکردنەوە ھەیە بە بێ ئەوەی جیاوازی ئایینی یان نەتەوەیی یان بیروبۆچوونی ھیچ کەسێکدا بکات، پێمان وایە ئەو ئەرکەی دەزگای خێرخوازی بارزانی گرتوویەتییە سەرشان ئەرکێکی ئایینی، نیشتمانی و ئەخلاقییە. لە مێژووی دروستبوونی ئەم دەزگایە تا ئێستا کە دەمەوێت ئاماژە بە چەند خاڵێک بدەم کە لەوانە بەداخەوە دوای ئەو ھێرشە دڕندایەی رێکخراوی تیرۆریستی داعش بۆ سەر عێراق و دوای بۆ سەر ھەرێمی کوردستان خوشک و برا ئێزدییەکانمان بوون بە قوربانی ھەرە گەورەی ئەم کردەوە تیرۆریستییە، ھەر لە رۆژی یەکەمەوە دەزگای خێرخوازی بارزانی ھەوڵی دا ئەوەی لە توانایدا بێت بیکات بۆ ئەوەی بەھانای خوشک و برا ئێزدییەکانەوە بچێت، لەو کاتەی شاخی شنگال ئابڵوقەدرابوو دەزگای خێرخوازی توانی خۆی بگەیەنێتە ئەو شوێنە و لەوێ لە خزمەت ئەو خوشک و برایانەدا بێت و بەردەوامیش ئەو ھاوکارییانەی پێویست بووبێت چی لەوێ چی دوای رزگارکردنی شنگال و چی ئەو خوشک و برا ئێزدییانەی لە کەمپەکاندا لە خزمەتیاندا بن".

مەسروور بارزانی لەدرێژەی قسەکانیدا ئەوەشی گوت "جگە لەوان ھەرچی ئەو لێقەوامانەی تر لە شاری مووسڵ یان لە شار و شارۆچکەکانی تر لە عێراقەوە بۆ ھەرێمی کوردستان ھاتوون دەزگای خێرخوازی بارزانی توانیویەتی خزمەتێکی بێ وێنەیان پێشکەش بکات و بە ئەرکیشی زانیوە، خوشک و برا مەسیحییەکان پێشتر کە ھەڕەشە و مەترسییان لەسەر بوو و روویان لە ماڵ و وڵاتی خۆیان کرد و ھاتنەوە بۆ کوردستان دیسانەوە دەزگای خێرخوازی بارزانی لە خزمەتییان بووە و بەردەوامیش دەبێت. لە خزمەتی ھەرکەسێک دەبێت کە پێویستی بە ھاوکاری بێت، ئەو خزمەت و ھاوکاری و دروستکردنی پەیوەندییە لەگەڵ خوشک و برا کریستیانەکان وایکرد کە لە ڤاتیکانیش بە فەرمی سوپاسی دەزگای خێرخوازی بارزانی بکرێت، ئێمە ئەوە بە منەت نازانیین و بە ئەرکی دەزانیین، پێمانوایە ئەرکی ھەموو تاکێکە کە بتوانێت خزمەت بە ھاووڵاتییان و ھاونیشتمانییان خۆی و خوشک و برایانی خۆی بکات و درێغی نەکات".

راوێژکاری ئەنجوومەنی ئاسایشی ھەرێمی کوردستان، مەسروور بارزانی لە وتارەکەیدا کە ئەمڕۆ دووشەممە لە کۆنفڕانسی ساڵانەی دەزگای خێرخوازی بارزانی پێشکەشی کرد چووە سەر بارودۆخی کەرکووک و ئەوەی رووی دا دیسانەوە بە "خیانەت" ناوی برد و گوتی: "دوای بەداخەوە کارەساتی خیانەتی ١٦ی ئۆکتۆبەریش کە خەڵکێکی زۆر ئاوارە بوون دیسان دەزگای خێرخوازی بارزانی دەرگای کردەوە و بەھانای ئەو خوشک و برایانەوە چوو کە ئاوارە بوون و ھاتن و لە شوێنی تر نیشتەجێ بوون، ئەمە ھاوکات بوو لەگەڵ ئەو بوومەلەرزەیەی کە ناوچەی گەرمیانی گرتەوە و ئەوبەری سنووری لە ناوچەکانی کرمانشان و سەرپێلی زەھاو لەوێش خەڵکێکی زۆر بوون بە قوربانی، دەزگای خێرخوازی بارزانی توانی ئەوەی لە سنووری ھەرێمی کوردستان بێت ھاوکاری بەو خوشک و برایانە بگەیەنێت، داواشی کرد کە رێگەیان پێ بدرێت ھاوکاریی پێویست بۆ خوشک و براکانی خۆیان لەو دیوی سنووریش ببەن، بەڵام بەداخەوە ئەم دەرفەتەیان پێ نەدرا و نەیانتوانی لە خزمەتی ئەو لێقەوماوانە بن کە لەودیوی سنوور دەژیین".

بارزانی گوتیشی: "لەماوەی کارکردنی دەزگا پرۆگرامێکی تریان ھەیە بەناوی ھاوکاریکردنی بێ نازان، ئازیزان، بێ دایک و باوکان کە لە ساڵی ٢٠١٧ ژمارەیان گەیشتە ١٩ ھەزار و ١٤٧ کەس، ئەمە پڕۆژەیەکە کە دەزگا دەستی پێکرد بۆ گەیاندنی ھاوکاری بۆ ئەو کەسانەی بێ نازن و پێویستییان بە کەسێک ھەیە ئاوڕییان لێ بداتەوە، لێرەشدا پێویستە سوپاسی دەوڵەتی ئیمارات، کوێت و شانشینی سعوودیە بکەین کە لە رێگەی کۆنسولخانەکانییانەوە لە رێگەی رێکخراوەکانییانەوە توانیویانە ھاوکار بن".

ئاماژەی بۆ ئەوەشکرد کە دەزگای بارزانی لە خزمەتی کەسوکاری شەھیدانیش بووە و گوتی: "لە کوردستان چەندین کەمپ لە کوردستاندا ھەن کە بەداخەوە لە ئەنجامی سیاسەتێکی شکستخواردووی سیاسی و ئیداریی و ئەمنی وایکردووە ئەو خەڵکە لە شوێنەکانی تر بێن و لە ھەرێمی کوردستان نیشتەجێ بن و چاوەڕوانی ئەوەمان دەکرد حکوومەتی عێراق خاوەندارییەتی ئەو کەمپانە بکات و بێت و یارمەتی زیاتری ئەو کەمپانە بکات، ئەمەش ئەرکی دەزگای خێرخوازی بارزانی و دامەزراوەکانی دیکەی حکوومەتی ھەرێمی قورستر کرد، وە ١٤ کەمپ لە ئەستۆی دەزگای خێرخوازی بارزانی بووە، ھەروەھا دەزگا سپۆنسەری ٢٢ سەنتەری رۆشنبیریی کردووە و فێری پێشەی نوێی کردوون و ئەو بەھرەیەی لەنێو ئەو خەڵکەدا ھەیە زیاتر بەرجەستە بکات".

مەسروور بارزانی باسی لەوەشکرد کە دەزگای خێرخوازی بارزانی ھەوڵی داوە ببێتە دەزگایەکی نێودەوڵەتی و لە ھەر شوێنێک مرۆڤ پێویستی بە خزمەت بێت بیکات، بۆ ئەوەی ئەو ھەستە جوانەی خەڵکی کوردستان نیشانی دەرەوە بدات کە خەڵکی کوردستان تەنھا چاوی لە ھاوکاریکردن نییە، بەڵکو چاوی لە ھاوکاریی کردنیشە، چاوی لەوەیە ھەمیشە بە بەخشەندەیی خۆی بتوانێت ھاوکاری بە خەڵکی لێقەوماو لەھەر شوێنێکی دنیا بێت بێت بگەیەنێت.

گوتیشی: "سەرەتا ئەو بوومەلەرزەیەی لە شاری وانی دا و زیانێکی زۆری لێ کەوتەوە دەزگا توانی ٤٠٠ خانووی ئامادەکراو بباتە ئەو شوێنە، دوای لە ئورفا و کۆبانێ و قامشلۆ و جەزیر. لە باشووری عێراق دەزگای خێرخوازی ھاوکاریی بە ھەژاران و کەم دەرامەت و لێقەومانان بکات، ئێستاش داواکاریین لە ھەموو لایەنە پەیوەندیدارەکان کە ئاسانکاری بکەن بۆ ئەوەی دەزگای خێرخوازی بارزانی بتوانێت ئەو ھاوکارییە مرۆییانەی کە پێویستە بۆ خەڵکی سڤیلی عفرین بگەیەنێت کە ئێستا پێویستییان پێیەتی".