سەرکۆماری ئێران پزیشکیان: "ئەمریکا دۆلار وەک چەک بەکاردەهێنێت"

ئیستانبوڵ - AA

سەرکۆماری ئێران، مەسعود پزیشکیان ئاماژەی بەوە کرد کە ئەمریکا دۆلار وەک چەک بەکاردەهێنێت، لە بەرامبەردا بریکس توانای ئەوەی هەیە ئاسانکاری بۆ بەکارهێنانی دراوی نیشتمانیی بکات.

بەپێی ئاژانسی هەواڵی فەڕمی ئێران İRNA، پزیشکیان لە ١٦هەمین کۆبوونەوەی گشتگیری لووتکەی سەرکردەکانی بریکسدا کە لە کازانی پایتەختی کۆماری تاتارستانی سەربە فیدراسیۆنی ڕووسیا بەڕێوەدەچێت، گوتارێکی پێشکەش کرد.

پزیشکیان ڕایگەیاند: "ئەمریکا بەمەبەستی کۆنترۆڵ کردنی وڵاتانی دیکە دۆلار وەک چەک بەکاردەهێنێت. جیهان بریکس وەک ڕێکخراوێک دەناسێت کە هێزی دۆلار لاواز دەکات و دراوە نیشتمانییەکان دەخاتە ئاراوە. وڵاتانی ئەندامی بریکس گەورەترین بەرهەمهێنەر و بەکاربەری وزە، دانەوێڵە و کەرەستەی دیکەن و، خاوەنی هێڵی گواستنەوە و ترانزێتی گرنگن، کە ئەوەیش بەکارهێنانی دراوی نیشتمانییان ئاسان دەکات".

پزیشکیان داوای لە وڵاتانی ئەندامی بریکس کرد دامەزراوە پەیوەندیدارەکان ڕابسپێرن خێراتر کار بکەن لە بارەی زیادکردنی هاریکارییە ئابووریی و بازرگانییەکان و، بەپێویستی زانی میکانیزمی هاوبەش دابمەزرێنرێت بەرامبەر سزا ئابوورییەکان.