بی بی سی وشەی "تیرۆری" بەکارنەھێنا و دەیلی میرۆریش تیرۆریستەکەی بە "منداڵی فریشتە"ناوبرد

لەندەن - AA

بی بی سی کە دامەزراوەیەکی میدیایی بەریتانیە، ئاماژەی "ھێرشی تیرۆریستی"ی بۆ کۆکوژییەکەی نیوزلەندا بەکارنەھێنا کە تێدا ٤٩ کەس بوونە قوربانی. لەلایەکی دیکەش، رۆژنامەی دەیلی میرۆر وێنەی منداڵی ئەو تیرۆریستەی بڵاوکردەوە و مانشێتی"منداڵی فریشتە"ی بۆ بەکارھێنا.

ژمارەیەک لە دامەزراوەکانی میدیایی بەریتانیا، لەبارەی ھێرشە تیرۆریستییەکەی دوێنێی نیوزلەندا بۆ سەر دوو مزگەوت، زمانێکی جیاوازیان بە بەراوورد بە ھێرشە تیرۆریستییەکانی ئەورووپا بەکارھێنا.

لە کاتێکدا کە زۆربەی میدیاکانی جیھان لە ھەواڵەکانیاندا، رووداوەکەیان بە شێوەیەکی گشتی بە ھێرشی تیرۆریستی ناوبرد، بەڵام دامەزراوەی میدیایی بەریتانیا، بی بی سی لەمبارەیەوە ھەواڵەکانیان تەنھا بە مانشێتی "ھێرشی چەکداری" یاخود "ھێرشکردنە سەر مزگەوت لە نیوزلەندا" بڵاوکردەوە.

بی بی سی بۆ ھێرشەکەی ٢٢ی ئاداری ٢٠١٧ لە لەندەن کە تێدا شەش کەس بوونە قوربانی، بە "ھێرشی تیرۆریستی" ناوبردبوو، بەڵام ھەمان ئاماژەی بۆ کۆکوژیەکەی نیوزلەندا بەکارنەھێنا کە تێدا ٤٩ مووسڵمان بوونە قوربانی.