ئەفغانستان.. تەقینەوەیەک نۆ کوژراو و ٢٠ برینداری لێکەوتەوە

کابول ــ AA

وەزارەتی ناوخۆی ئەفغانستان رایگەیاند کە لە ئاکامی تەقینەوەیەک لە کابولی پایتەخت، نۆ کەس کوژراون و ٢٠ی دیکەیش برینداربوون.

لەمبارەیەوە کەناڵی تلوع نیوز لە وەزیری ناوخۆی ئەفغانستان، مەسعود ئانداربی گواستووەتەوە کە تەقینەوەیەک لە گەڕەکی PD٥ لە کابول روویداوە و لە ئاکامدا، نۆ کەس کوژراون و ٢٠ی دیکەیش برینداربوون.

پێشتر وەزارەتی ناوخۆی ئەفغانستان رایگەیاندبوو کە ئەمڕۆ یەکشەممە، تیرۆریستان ھێرشیانکردووەتە سەر گەڕەکی PD٥ لە شاری کابول کە ژمارەیەک منداڵ، ئافرەت و بەساڵاچوو برینداربوون.

ئاماژەی بەوەیشدابوو کە ماڵەکانی ئەو گەڕەکەی کە کراوەتە ئامانج، زیانی زۆریان بەرکەوتووە و باسی لەوەشکردبوو کە لە ھێرشەکەدا، ئەندامی پەرلەمانی ئەفغانستان، خان محەمەد ورداک برینداربووە.

کەناڵی تلوع نیوز بڵاویکردەوە کە تەقینەوەیەک، ئۆتۆمبێلی خان محەمەد ورداک-ی کردووەتە ئامانج، بەڵام ناوبراو لە تەقینەوەکەدا رزگاری بووە.

تا ئێستا ھیچ لایەنێک بەرپرسیاریەتی خۆی لە ئەنجامدانی تەقینەوەکە، رانەگەیاندووە.