ئیدلب - AA
ئەو هاووڵاتییە مەدەنییانەی لە پەلامارەکانی رژێمی بەشار ئەسەد و هاوپەیمانەکانی هەڵاتون و لە کەمپی ئاوارەکانی ئیدلب دەمێننەوە، بەهۆی خراپی ژێرخان و نەبوونی سیستمێکی گونجاوی ئاو و ئاوەڕۆ دووچاری مەترسیی نەخۆشی لیشمانیا بوون.
محەمەد ئیبراهیم کە یەکێکە لەو کەسانەی لەگەڵ خێزانەکەیدا لە ترسی پەلامارەکان هەڵاتون و هاتوونەتە کەمپی شام ئەلخەیر لە لێدوانێکیدا بۆ پەیامنێری ئاژانسی ئانادۆڵو باسی لەوە کرد کە کۆبوونەوەی ئاوی پیس لە ئاوەڕۆ سەرکراوەکاندا بووەتە هۆی دروستبوونی بۆنی ناخۆش و کۆبوونەوەی میکرۆب، ئەمەیش وای کردووە حەوت ئەندامی خێزانەکەی تووشی نەخۆشی لیشمانیا ببن.
ناوبراو ئاماژەی بە نەبوونی بنکەی تەندروستیی لە کەمپەکە کرد و گوتی: "هەوڵماندا چەند رێگایەکی سروشتیی بەکاربهێنین، بەڵام سوودی نەبوو. دەترسین ئەم نەخۆشییە بڵاوببێتەوە و لە کۆنترۆڵ دەرچێت، پێویستمان بە چارەسەر و خزمەتگوزاری تەندروستیی هەیە".
لای خۆشیەوە بەرپرسی کەمپی شام ئەلخەیر، عەدنان قەدوور ئەوەی ئاشکرا کرد کە ٤٢٥ خێزان لە کەمپەکەدا دەژین و نەخۆشی لیشمانیا لەناو ١٢٠ خێزاندا بڵاوبووەتەوە.
عەدنان قەدوور باسی لەوەیش کرد کە بەهۆی نەبوونی دەرمان و کێشەی کۆبوونەوەی ئاوی پیسەوە نەخۆشییەکە لە پەرەسەندندایە و رۆژانە ژمارەی توشبووان زیاتر دەبێت.
لای خۆشییەوە ئیبراهیم مەککی کە پزیشکێکی شاری ئیدلب-ە لە لێدوانێکیدا ئەوەی خستەڕوو کە نەخۆشی لیشمانیا نەخۆشییەکی گوازراوەی پێستە و بەهۆی پێوەدانی جۆرێکی مێشوولە کە بە مێشوولەی خاک ناسراوە تووشی مرۆڤ دەبێت. نەخۆشییەکە بەگوێرەی ژمارەی برینەکان، شوێنەکەی لە جەستەدا و توانای بەرگریی کەسە تووشبووەکە چارەسەر دەکرێت.
ئیبراهیم مەککی سکاڵای لە نەبوونی دەرمان لە ناوچەکە کرد و گوتی: "بۆ خۆپاراستن لە نەخۆشی پێویستمان بە دەرمانی قەڵاچۆکردنی مێروو هەیە، هەروەها دەبێت مەنهۆڵ و ئاوەڕۆ سەرکراوەکان، سەریان دابخرێت".
