لێدوانی کەماڵ کڵچدار ئوغڵو لەبارەی دەرکردنی یاسای تایبەت بە قۆناغی تورکیای بێ تیرۆر

سەرۆکی گشتی پارتی گەلی کۆماریی (جەهەپە) کەماڵ کڵچدارئوغڵو ڕایگەیاند، "یاسای چوارچێوە دەبێ ئاکامی بنەمایەکی یاسایی ڕوون بێت، چەکدانان دەبێ ڕاستی بێت و پەسەندکرابێت و گەڕانەوە بۆی نەبێت. پەرە بە سیاسەتی دیموکراتیک بدرێت و ئەەش لە کاتێکدا کە پێکهاتەی یەکگرتوو و بنەماکانی سەروەری وڵات پارێزراو بێت".

کەماڵ کڵچدارئوغڵو لە بارەگای پارتەکەیدا لەبارەی قۆناغی "تورکیای بێ تیرۆر" و هەوڵەکان بۆ دەرکردنی "یاسای چوارچێوە" لە کۆنگرەیەکی ڕۆژنامەوانیدا قسەی کرد.

کڵچدارئوغڵو ڕایگەیاند، "چەکدانان دەبێ ڕاستی بێت و پەسەندکرابێت و گەڕانەوە بۆی نەبێت. پێکهاتەی یەکگرتوو و بنەماکانی سەروەری تورکیا پارێزراو بێت".

سەرۆکی جەهەپە ئاماژەی بە ڕاپۆرتی ساڵی ١٩٨٩ی حزبەکەی لەبارەی پرسی کورد کرد و گوتی: "پارتی گەلی کۆماری (CHP) و پارتی سۆسیال دیموکراتی گەل (SHP) لەو ساڵانەدا دانیان بە پرسی کورد ناوە" و ڕاشیگەیاند کە پشتیوانیان کردووە لە هەڵوەشاندنەوەی سنووردارییەکانی پەیوەندیدار بە بەکارهێنانی زمانی زگماکی.

سەرۆکی جەهەپە گوتی کە حزبەکەی لە ساڵی ٢٠٢٠دا لەسەر پرسەکانی کۆمەڵایەتی لەوانەش پرسی کوردەکان لەسەر بنەمای دیموکراسی و پەرلەمان تەوەری جەختی کردووەتەوە و ئێستاش پەرلەمان مەرجەعی سەرەکی چارەسەری ئەو کێشەیەیە.

کەماڵ کڵچدارئوغڵو بۆ چارەسەرێکی بنەڕەتی، چوار تەوەری بە گرنگ زانی و گوتی: "چەکدانان و هەڵوەشاندنەوە پێویستە دانپێدانراو بێت، چاکسازی دیموکراتیک و یاسایی بکرێت، گرتنەبەری ڕێکاری ئەمنی لە ناوچەکانی ژێرکاریگەری گرووپەکانی پەیوەندیدار بە ڕێکخراوەکە لە سووریا و عێراق و ڕێکخستنەوەیەکی ستراتیژی بۆ سنووردارکردنی دەستوەردانەکانی بیانی لە ڕێگەی هێزە داردەستەکان".

سەرۆکی جەهەپە گوتیشی، کۆتاییهاتنی تیرۆر تەنیا پرسێکی تەناهی و یان یاسایی نییە بەڵکو دەتوانێ دەرفەتێکی مێژوویی بێت بۆ تورکیا. بە گوتەی کڵچدارئوغڵو سەرکەوتنی قۆناغەکە پێویستی بە سەروەریی یاسا، یەکسانی هاووڵاتیان و پاراستنی یەکپاڕچەیی وڵات و پەرەپێدانە بە ئابووری و سیاسەتی دەرەوەی سەربەخۆ.

سەرۆکی گشتی پارتی گەلی کۆماریی (جەهەپە) کەمال کڵچدارئوغڵو لە کۆتاییدا جارێکی دیکە جەختی لەوە کردەوە کە پێویستە مەرجەعی ئەو قۆناغە پەرلەمانی تورکیا بێت و گوتیشی: "یاسای چوارچێوە دەبێ ئاکامی بنەمایەکی یاسایی ڕوون بێت، چەکدانان دەبێ ڕاستی بێت و پەسەندکرابێت و گەڕانەوە بۆی نەبێت. پەرە بە سیاسەتی دیموکراتیک بدرێت و ئەەش لە کاتێکدا کە پێکهاتەی یەکگرتوو و بنەماکانی سەروەری وڵات پارێزراو بێت".