لێدوانی پنتاگۆن لەبارەی نەخشە رێگای منبچ

واشنتۆن - AA

گوتەبێژی وەزارەتی بەرگری ئەمریکا، ئەریک پاھۆن، رایگەیاند کە سەربازانی تورکیا و ئەمریکا بە "ھەماھەنگی" یەکتری بەڵام بە شێوەیەکی "سەربەخۆ" دەستیان بە چالاکییەکانی گەڕان و دەورییە لە شارەدێی منبج-ی باکووری سووریا کردووە.

گوتەبێژی وەزارەتی بەرگری ئەمریکا، پاھۆن بۆ ئاژانسی ئانادۆڵو ھەڵسەنگاندنی بۆ دوا پێشھاتەکانی منبج کرد.

پاھۆن رایگەیاند "یەکینەکانی سوپای ئەمریکا و تورکیا لە ١٨ی حوزەیران لە چوارچێوەی نەخشە رێگای منبج بە "ھەماھەنگی" یەکتری بەڵام بە شێوەیەکی "سەربەخۆ" دەستیان بە چالاکییەکانی گەڕان و دەورییە لە شارەدێی منبج-ی باکووری سووریا کردووە".

پاھۆن راشیگەیاند کە سەقامگیری منبج لە رووی ئۆپەراسیۆنەکانی دژی داعش لە رۆژھەڵاتی سووریا زۆر گرنگە. گوتیشی: "چالاکییەکانی گەران و دەورییەی ھاوبەش، بەشێکە لە پەیوەستەیی ئەمریکا بە تورکیا وەک ھاوپەیمانێکی نێو ناتۆ".

بەپێی ئەو راگەیەندراوەی ئەمرۆِ لە سەرۆکایەتی ئەرکانی سوپای تورکیا بڵاوکراوەتەوە، "لەچوارچێوەی نەخشە رێگای منبج و رێکاری ئەمنی کە پێشتر رێککەوتنی لەسەر کرابوو، سوپای تورکیا و سوپای ئەمریکا بە ھاوبەشی چالاکی گەڕۆکیان لەمڕۆ بەدواوە لە ھێڵی نێوان ناوچەی قەڵغانی فورات و منبچ دەستپێکردووە".
نەخشە رێگای منبج لە نێوان ئەمریکا و تورکیا

ئەمریکا و تورکیا، گەیشتبوونە رێککەوتنێک لەبارەی دەرکردنی یەپەگە/پەکەکە لە منبج کە دەکەوێتە رۆژئاوای رووباری فوڕات لە باکووری سووریا.

ھەروەھا وەزیری دەرەوەی تورکیا، مەولود چاوشئۆغڵو و ھاوتا ئەمریکییەکەی، مایک پۆمپیۆ لە ٤ی حوزەیرانی رابردوو لە کۆبوونەوەیەکدا نەخشە رێگایەکیان بەمەبەستی دەستەبەرکردنی ئاسایش و سەقامگیری لە شارۆچکەکە پەسند کردبوو.