بڕیاری یەکگرتنی گرووپەکانی ئۆپۆزسیۆن لە باشووری سووریا

دەرعا/ئەنقەرە - AA

ژمارەیەک لە گرووپە چەکدارییەکانی ئۆپۆزسیۆنی سووریا لە ھەردوو پارێزگای دەرعا و قونەیترا بڕیاری یەکگرتنیان دا.

بەپێی ئەو زانیاریانەی لە سەرچاوەکانی ئۆپۆزسیۆنی سووریا وەرگیراون، ژمارەیەک لە گرووپە چەکدارییە ئۆپۆزسیۆنەکانی سەربە سوپای سووریای ئازاد لە ھەردوو پارێزگای دەرعا و قونەیترا لە ژێر ناوی "سوپای رزگاری" بڕیاری یەکگرتنیان داوە.

لە ھەژماری تایبەتی تۆڕی کۆمەڵایەتی سەر بەم پێکھاتە نوێیە راگەیەنرا کە ئەوان (سوپای رزگاری) پەیوەست دەبن بە چارەسەریی سیاسی و پاراستنی خەڵکی سڤیل لە سووریا.

بڕیاری یەکگرتنی ئەم گرووپانە لە دوای ئامادەکارییەکانی رژێمی ئەسەد دێت بەمەبەستی ھێرشەکردنە سەر ناوچەکانی ژێر کۆنترۆڵی سوپای سووریای ئازاد لە باشووری ئەو وڵاتە.

دوو لەسەر سێی پارێزگای دەرعا و سێ لەسەر چواری پارێزگای قونەیترا لە سووریا لە ژێر کۆنترۆڵی ھێزەکانی ئۆپۆزسیۆنی ئەو وڵاتە دایە.