لیوا یەحیا ڕەسوڵ: "ناوچە سنوورییەکانی عێراق لەلایەن ئەمریکاوە بۆردومان کراون"

هەولێر - AA

گوتەبێژی فەرماندەی گشتی هێزە چەکدارەکانی عێراق، لیوا یەحیا ڕەسوڵ ڕایگەیاند، شارۆچکەی قائیم و ناوچە سنوورییەکانی عێراق، لەلایەن فڕۆکە جەنگییەکانی ئەمریکاوە بۆردومان کراون کە ئەوەش پێشێلکردنی سەروەریی عێراقە.

لیوا یەحیا ڕەسوڵ ڕاگەیەندراوێکی لەبارەی هێرشە ئاسمانییەکانی ئەمریکا بۆسەر بارەگاکانی حەشدی شەعبی لە عێراق بڵاوکردەوە و تیایدا ڕایگەیاندووە کە شارۆچکەی قائیم لە پارێزگای ئەنبار و ناوچە سنوورییەکانی عێراق لەلایەن فڕۆکەکانی ئەمریکاوە بۆردومان کراون.

ئاماژەی بەوەشداوە، ئەنجامدانی ئەو هێرش و بۆردومانانەی ئەمریکا، لە کاتێکدایە کە عێراق بەجیددی هەوڵ بۆ دەستەبەرکردنی سەقامگیریی لە ناوچەکە دەدات.

هەروەها لە ڕاگەیەندراوەکەدا هاتووە: "بۆردومانەکانی ئەمریکا، پێشێلکردنی سەروەریی عێراقن و هەوڵەکانی حکوومەتی عێراقیش بۆ دەستەبەرکردنی سەقامگیری لە ناوچەکە لەناودەبن، هەروەها دەبنە هەڕەشە کە عێراق و ناوچەکە بەرەو دەرئەنجامە پێشبینی نەکراوەکان ڕادەکێشێت کە لێکەوتەکانی کارەساتبار دەبن بۆ ئاسایش و سەقامگیریی عێراق و ناوچەکە".

پێشتر فەرماندەیی ناوەندی هێزەکانی ئەمریکا ڕایگەیاندبوو کە شەوی ٢ لەسەر ٣ی ئەم مانگە لە میانی زنجیرەیەک هێرشی ئاسمانيیدا، ٨٥ ئامانجیان لە عێراق و سووریا بۆردومان کردووە.

ئاماژەی بەوەشدابوو، ئەو ئامانجانەی کە لە عێراق و سووریا بۆردومان کراون، سەربە گرووپە چەکدارەکانی نزیک لە ئێران بوون.