حکوومەتی عێراق لە هێرشەی دڕۆنییەکەی هەولێر دەکۆڵێتەوە

سەرۆکوەزیرانی عێراق عەلی فالح زەیدی فەرمانی کرد بە دروستکردنی لێژنەیەکی لێکۆڵینەوە لەبارەی هێرشەی دڕۆنییەکەی ئەمڕۆی هەولێر.

لەبارەی هێرشە دڕۆنییەکەی سەر نووسینگەی تایبەتی سەرۆکوەزیرانی هەرێم مەسرور بارزانی و شوێنی نیشتەجێبوونی سەرۆکی ئاژانسی ئاسایش و هەواڵگری (پاراستن)ی لە هەولێر، سەرۆکوەزیرانی عێراق فەرمانی کرد بە دروستکردنی لێژنەیەکی لێکۆڵینەوە لە هێرشەکە.

لە فەرمانەکەدا، سەرۆکوەزیرانی عێراق داوای کردووە کە بە زووترین کات لەبارەی هێرشەکە لێکۆڵینەوە بکرێت و هەموو ڕەهەندەکان و هۆکارەکانی بۆ ڕای گشتی ئاشکرا بکرێت.

دژەتیرۆری ھەرێمی کوردستان-عێراق لە ڕاگەیاندراوێکدا بڵاوی کردەوە، ئەمڕۆ دووشەممە ١٧ی ئابی ٢٠٢٦ لە کاتژمێر ٠٠:٢٨، دوو درۆنی بۆمبڕێژکراو لە جۆری (حەدید-١١٠) لە دیوی سنووری ئێرانەوە ئاراستەی بارەگای نووسینگەی تایبەتی سەرۆکوەزیرانی ھەرێمی کوردستان و شوێنی حەوانەوەی بەڕێوەبەری ئاژانسی پاراستن لە قەزای پیرمام سەربە پارێزگای ھەولێر کراون.

هێرشەکە لەسەر ئاستی هەرێمی کوردستان و عێراق کاردانەوەی لێکەوتووەتەوە.