ژمارەیەک گەنجی سووریا لە دەرعا لەلایەن سوپای ئیسرائیلەوە ڕفێندران

سوپای ئیسرائیل لە میانی ئەنجامدانی پێشێلکارییەکی نوێی بۆ سەر سەروەریی سووریا، ژمارەیەک گەنجی لە گوندێکی سەربە پارێزگای دەرعا دەستگیرکرد.

کەناڵی فەرمیی سووریا "ئەلئیخبارییە" بڵاوی کردەوە کە ھێزەکانی سوپای ئیسرائیل ھەڵیانکوتاوەتە سەر گوندی عابدین سەربە پارێزگای دەرعا ڕۆژئاوای سووریا.

ڕاشیگەیاندووە: "ھێزەکانی داگیرکار (ئیسرائیل) لە میانی ھەڵکوتانە سەر گوندی عابدین، ژمارەیەک گەنجیان لە گوندەکە ڕفاندووە".

کەناڵەکە، وردەکاری زیاتری لەوبارەیەوە نەخستووەتەڕوو.