هیندستان.. هه‌ڵكردنی گه‌رده‌لوولێكی تۆز و خۆڵ بووه‌ هۆی گیان له‌ده‌ستدانی ١٢٥ كه‌س

ئه‌نقه‌ره‌ - AA

بە هۆی هه‌ڵكردنی گه‌رده‌لوولێكی تۆز و خۆڵ له‌ باكووری هیندستان ١٢٥ كه‌س گیانیان له‌ده‌ست دا.

بە پێی هەواڵێکی بی بی سی، بە هۆی هه‌ڵكردنی گه‌رده‌لوولێكی به‌هێزی تۆز و خۆڵ له‌ هه‌رسێ ویلایه‌تی راجاستان، ئوتتار پراده‌ش و ئوتتارخاند به‌لانیكه‌م ١٢٥ كه‌س گیانیان له‌ده‌ست داوه و سه‌دانی دیكه‌ش بریندار بوون.

گه‌رده‌لووله‌كه‌ كاریگه‌ری كردۆته‌ سه‌ر ویلایه‌ته‌كانی په‌نجاب و هایرانا و ویلایه‌تی مادهیا پراده‌ش له‌ ناوه‌ڕاستی وڵاته‌كه‌، به‌م هۆیه‌وه‌ ژماره‌یه‌ك له‌ خانووه‌كان رووخاون و دره‌خت و ستوونی كاره‌باییش كه‌وتوونه‌ته‌ خواره‌وه‌ و ژماره‌یه‌ك له‌ ئاژه‌ڵه‌كانی له‌وه‌ڕگاش مردار بوون.

له‌ هه‌واڵه‌كه‌دا ئاماژه‌ به‌وه‌ دراوه‌ زۆربه‌ی ئه‌و كه‌سانه‌ به‌هۆی رووخانی ماڵه‌كانیان له‌ ئاكامی توندی گه‌رده‌لووله‌كه‌ و هه‌وره‌بروسكه گیانیان له‌ده‌ست داوه‌.

سه‌رۆكوه‌زیرانی هیندستان له‌ هه‌ژماری فه‌رمی خۆی له‌ تۆڕی كۆمه‌ڵایه‌تی خه‌مباری خۆی به‌م هۆیه‌وه‌ ده‌ربڕی، پرسه‌ و سه‌ره‌خۆشی خۆی ئاراسته‌ی كه‌سوكاری قوربانیان كرد، هیوای چاكبوونه‌وه‌یشی بۆ برینداران خواست و لایه‌نه‌ په‌یوه‌ندیداره‌كانیشی راسپارد كه‌ به‌ هه‌ماهه‌نگی حكوومه‌ته‌ خۆجێیه‌كان هاوكاری زیانبه‌ركه‌وتووانی ئه‌و كاره‌ساته‌ بكه‌ن‌.

لایه‌نه‌ په‌یوه‌ندیداره‌كان نیگه‌رانی ئه‌وه‌ن كه‌ ژماره‌ی قوربانیان به‌رزبێته‌وه‌ و هۆشداریشیان داوه‌ له‌ خراپتربوونی كه‌ش و هه‌وا.