عادل نوری: "سەرقاڵی گەڵاڵەكردنی میكانیزمی نوێین بۆ مووچەی فەرمانبەران"

سلێمانی - AA

ئەندامێكی پەرلەمانی عێراق عادل نوری لە كۆنگرەیەكی رۆژنامەوانیدا لە نووسینگەی سلێمانی لەبارەی كێشەی مووچەخۆرانی هەرێمی كوردستان و قەیرانی داراییەوە گوتی: "لە هەرێمی كوردستان دوو دۆسیەی سەرەكیمان هەیە (ئاسایش و ئارامی، دارایی و خزمەتگوزاری)، حكوومەت و كاربەدەستان لەروی ئاسایش و ئارامییەوە لە 100 % سەركەوتنیان بەدەستهێناوە، هەرچەندە داعش و تیرۆریستان لە هەمولایەكەوە پەلاماری كورد و كوردستانیان داوە، بەڵام دۆسیەی ئابووری و خزمەتگوزاری شكستێكی گەورەی هێناوە و لایەنە سیاسییەكان و حكوومەت و وەزارەتەكان جێگەی نیگەرانی و گلەیین و نەیانتوانیوە ئەو دۆسیە چارەسەر بكەن".

ئەو گوتی: "وەك نوێنەران ناكرێت لەم كارەساتە بێدەنگ بین، بۆیە دوای ئەوەی بۆمان دەركەوت ئەو دەزگایانەی بەرپرسیارانە مامەڵەیان نەكردووە و ئەمین نەبوون، ناچارین میكانیزمی تر دەگرینە بەر بۆ گواستنەوەی مووچە بۆ گیرفانی مووچەخۆران".

عادل نوری كە هاوكات گوتەبێژی لیژنەی دەستپاكی پەرلەمانی عێراقە ئەوەشی گوت: "لە ئێستادا لەگەڵ پەرلەمانتارانی هەموو فراكسیۆنەكانی تر لە پەرلەمانی عێراق لەگەڵاڵەكردنی میكانیزمێكی ترداین نەوەك ئەم میكانیزمە، ئەگەر حكوومەتی هەرێم بە خۆپیشاندان و مانگرتن و داواكارییەكان نەبێتە فشار لەسەری ئەوكات ناچار دەبین لەوەی میكانیزمی تر بگرینە بەر كە یەكیان رەنگە لە رێگەی كارتی زیرەكەوە هەژماری بانكی بۆ هەموو فەرمانبەران بكەینەوە لە بەغدا و مانگانە مووچەكانیان بچێتە سەر هەژمارەكەی".

ئەو پەرلەمانتارە چەند بانكێكی هەرێمی كوردستانی تۆمەتبار كرد بەوەی دەستیان بەسەر مووچەی ژمارەیەك لەو مووچەخۆرانەی هەرێم لە رەگەزنامەی باری شارستانی و پاسەوانانی سنوور كە مووچەكانیان لەسەر بەغدایە گرتووە.