چاوشئۆغڵو: "کارەکانی ھەڵکەندنی بیر لە دەریای سپی رۆژھەڵات دەستپێدەکات"

ئەنقەرە - AA

وەزیری دەرەوەی تورکیا، مەولود چاوشئۆغڵو رایگەیاند کە بەمەبەستی پاراستنی مافەکانی وڵاتەکەی و کۆماری قوبرسی باکووری تورکی و لە رۆژھەڵاتی دەریای سپی، رێوشوێنی پێویست گیراوەتە بەر و کارەکانی ھەڵکەندنی بیر لە ناوچەی دەریای ناوەڕاستی رۆژھەڵات لەلایەن تورکیا لە وەرزی پایزی داھاتوو دەستپێدەکات.

چاوشئۆغڵو لەگەڵ جێگری سەرۆکی کۆماری قوبرسی باکووری تورکی و وەزیری دەرەوە، قودرەت ئۆزارسای لە تەلاری وەزارەتی دەرەوەی تورکیا کۆنگرەیەکی رۆژنامەوانی سازکرد.

لەبارەی پرسیاری ئەوەی کە ئایا تورکیا کەی دەست بە چالاکییەکانی گەڕان بە دوای ھایدرۆکاربون لە دەریای سپی رۆژھەڵات دەکات، چاوشئۆغڵو گوتی :"لەم ناوچەیە، لە دەریای سپی رۆژھەڵات تورکیا ناوچەی ئابووری ھەیە. ھاوکات کەناراوەکانی کۆماری قوبرسی باکووری تورکی دەکەوێتە ئەو شوێنە. ئێمە لەسەر داوای کۆماری قوبرسی باکووری تورکی بۆ پاراستنی مافەکانی ھەردوو لایەن رێوشوێنی پێویستمان گرتووەتەبەر".

چاوشئۆغڵو راشیگەیاند کە تورکیا ئێستا دەتوانێ دەست بەکارەکانی ھەڵکەندنی بیر لە ناوچەکەدا بکات و کارەکانی وەزارەتی وزەی تورکیاش لەمبارەیەوە زۆر بە باشی بەڕێوە دەچێت.

وەزیری دەرەوەی تورکیا راشیگەیاند کە وڵاتەکەی لەمبارەیەوە تاوتوێی لەگەڵ یەکێتی ئەورووپا و یۆنان کردووە و سبەینێش پرسی ھەڵکەندنی بیر لەو ناوچەیە لەگەڵ وەزیری دەرەوەی یۆنان، نیکۆس کۆجیاس لە شاری ئیزمیر تاوتوێ دەکات.