گەڕاوی گوندی بوداکڵی کە دەکەوێتە پارێزگای بەدلیس ھاوینان خەڵکێکی زۆر بەمەبەستی چارەسەر رووی تێدەکەن، زستانانیش میوانداریی ئەسپ و مانگاکانی ناوچەکە دەکات.
گوندی بوداکڵی سەربە شارۆچکەی گورۆیمەیە و بەھۆی ئەو گەڕاوە ناسراوەو ساڵانە گەشتیارێکی زۆر رووس تێدەکەن، بەجۆرێک رکابەریی زۆربەی شوێنە گەشتیارییەکان دەکات، پلەی گەرمیی ئاوەکەی نزیکەی٤٠ پلەی سەدییە، لە وەرزی ھاویندا چەندین گەشتیار لە تورکیا و دەرەوە رووی تێدەکەن، لە وەرزی زستانانیشدا دەبێتە شوێنی کەیف و سەفا بۆ ئەسپ و مانگاکان.
لەکاتێکدا پلەی گەرمیی لە ژێر سفرەو گوندەکە بە بەفر داپۆشراوە زۆرێک لە ئەسپ و مانگاکانی ناوچەکە لەلایەن خاوەنەکانیانەوە دەبردرێنە گەڕاو، ھەم گەرمیان دەبێتەوە ھەمیش سوودمەند دەبن لەو ئاوە پڕ شیفایە.
یەکێک لە گاوانەکانی گوندەکە بەناوی نازم باغڵان بۆ ئاژانسی ئانادۆڵو گوتی: "لەبەر ئەوەی مانگاکانم لە ئاخوڕەکەیاندا قوڕاوی دەبن، زۆر پێویستیان بە پاککردنەوە ھەیە، ئەو گەڕاوە نیعمەتێکی باشە بۆیان، بەتایبەتی لە وەرزی زستان کە زۆر قوڕاوی دەبن."
باغڵان ھەروەھا گوتی: "جگە لە ئێمە خاوەن ئەسپەکانیش سوود لەو گەڕاوە دەبینن و ھەمووی پێکەوە دەچنە ناو ئاوەکەی."
رێک کە سەیری دیمەنی گەڕاوەکە دەکەیت قسەکانی باغڵانی گاوانت دێتەوە یاد، لەوێدا خۆشیی ئەسپ و مانگاکان بە ئاشکرا ھەستی پێدەکرێ، ھەڵمی ئەو ئاوە گەرمە ئاوێتەی دیمەنی ئاژەڵەکان بووەو تابلۆیەکی کەمێ تاریک و پڕ لە خۆشی بە بینەر دەبەخشێ.
