دیدار رئيس اجرایی افغانستان با رئيس جمهور پاکستان در دوشنبه
عبدالله عبدالله، رئیس اجرایی دولت افغانستان با ممنون حسین، رئيس جمهور پاکستان در دوشنبه دیدار کرد.
استانبول/ خلیل سلحشور/ خبرگزاری آناتولی
عبدالله عبدالله، رئیس اجرایی افغانستان در حاشیه اجلاس بین‌المللی «دهه اقدام برای آب و توسعه پایدار» دیروز چهارشنبه با ممنون حسین، رئیس جمهور پاکستان در دوشنبه پایتخت تاجیکستان دیدار و گفتگو کرد.
ممنون حسین، رئيس جمهور پاکستان در دیدار با عبدالله عبدالله، رئیس اجرایی دولت افغانستان در حاشیه اجلاس بین‌المللی «دهه اقدام برای آب و توسعه پایدار» در دوشنبه، پایتخت تاجیکستان، از نقش فعال دولت افغانستان در کشته‌شدن مولانا فضل‌الله، رهبر تحریک طالبان پاکستان قدردانی کرد و خواهان بهبود روابط و همکاری مشترک دو کشور شد.
وی با اشاره به دیدار و تلاش‌های مشترک رهبران دو کشور گفت: برنامه مشترک پاکستان و افغانستان برای صلح و همبستگی می‌تواند هردو کشور را در راه دست‌یافتن به ثبات و امنیت منطقه‌ای و بهبود روابط میان دو کشور کمک کند.
رئیس اجرایی افغانستان نیز در این دیدار تصریح کرد: افغانستان تروریست‌ها را بدون استثنا تروریست و دهشت‌افکن می‌داند و تروریست خوب و بدی از نظر دولت افغانستان وجود ندارد. در گذشته نیز رهبران مهم طالبان پاکستان را هدف قرارداده و این‌بار نیز علیه مولانا فضل الله اقدام صورت گرفت.
وی در ادامه صحبت‌های خود افزود: تماس‌ها میان رهبران دو کشور افزایش یافته و امیدواریم هماهنگی و اقدامات صادقانه میان طرفین برای دست یافتن به صلح و مبارزه مشترک با دهشت‌افکنی کمک کند.
