АНКАРА / ИСТАНБУЛ (АА) - Турската агенција за справување со катастрофи (АФАД) денес достави во Авганистан околу 25 тони хуманитарна помош за луѓето погодени од земјотресот што се случи изминатиов викенд, јавува Анадолу.
По земјотресот со магнитуда од 6 степени што ја погоди источната авганистанска покраина доцна во неделата, од Турција беше побарана помош.
Како одговор на повикот, хуманитарната помош подготвена во координација со турското Министерство за надворешни работи, Агенцијата за управување со катастрофи и вонредни состојби (AFAD) и Турската Црвена полумесечина беше доставена во регионот со авион A400M на Турските воздухопловни сили, кој полета од аеродромот „Еркилет“ во Кајсери.
Сејфетин Карабулут, раководител на Одделот за меѓународна хуманитарна помош на АФАД, кој го водеше тимот задолжен за доставување на помошта во авганистанскиот град Џалалабад, рече дека Кунар е најпогодена покраина од земјотресот.
Карабулут истакна дека според локалните власти, во земјотресот животот го загубиле 1.457 лица, а над 3.000 се повредени.
Нагласувајќи дека хуманитарната помош е подготвена како одговор на итниот апел на Авганистан, Карабулут рече дека благодарение на координацијата меѓу надлежните единици на турското Претседателство и министерствата за внатрешни работи, надворешни работи и национална одбрана, помошта е испратена од Кајсери до Џалалабад утрово.
„Околу 25 тони хуманитарна помош, која се состои од засолништа, хигиенски комплети и пакети со храна, кои се итно потребни во регионот, се доставени до Авганистанската Црвена полумесечина. Итната хуманитарна помош што ја доставивме во регионот ќе биде дистрибуирана до оние на кои им е потребна во регионот во соработка со Авганистанската Црвена полумесечина и Турската Црвена полумесечина“, додаде тој.