Turqia

Turqia thirrje për uljen e tensioneve midis Ukrainës dhe Rusisë

Përshkallëzimi nuk është në interesin e askujt, tha Këshilli i Sigurisë Kombëtare i Turqisë

Mehmet Tosun   | 27.01.2022
Turqia thirrje për uljen e tensioneve midis Ukrainës dhe Rusisë Foto: Murat Kula / AA

Ankara

Këshilli i Sigurisë Kombëtare i Turqisë bëri thirrje për deeskalimin e tensioneve midis Rusisë dhe Ukrainës, raporton Anadolu Agency (AA).

Përshkallëzimi nuk është në interesin e askujt, tha këshilli, i kryesuar nga presidenti turk Recep Tayyip Erdoğan, në një deklaratë pas takimit në kompleksin presidencial në kryeqytetin Ankara.

Rusia kohët e fundit ka grumbulluar dhjetëra mijëra trupa pranë kufirit lindor të Ukrainës, duke shkaktuar frikën se Kremlini mund të planifikojë një tjetër ofensivë ushtarake kundër fqinjit të tij ish-sovjetik.

Moska ka mohuar se po përgatitet për pushtim, duke thënë se trupat e saj janë atje për stërvitje.

Të mërkurën, presidenti Erdoğan përsëriti se është gati të mirëpresë liderët e Rusisë dhe Ukrainës për të “hapur rrugën për rivendosjen e paqes” pasi tensionet midis dy vendeve tregojnë pak shenja zvogëlimi.

“Turqia dëshiron që tensionet mes Rusisë dhe Ukrainës të zgjidhen përpara se të kthehen në një krizë të re”, tha presidenti turk gjatë një interviste televizive.

Procesi i afrimit midis Turqisë dhe Armenisë

Në lidhje me procesin e fundit të afrimit midis Turqisë dhe Armenisë, deklarata e Këshillit të Sigurisë Kombëtare theksoi rëndësinë e përmirësimit të mekanizmave dhe përpjekjeve për forcimin e paqes dhe stabilitetit në Kaukazin e Jugut, me përpjekjet konstruktive dhe të sinqerta të palëve, veçanërisht Turqisë dhe Armenisë.

Turqia dhe Armenia kanë qenë prej kohësh në mosmarrëveshje për një mori çështjesh, duke përfshirë refuzimin e Armenisë për të njohur kufirin e tyre të përbashkët e deri te incidentet historike gjatë Luftës së Parë Botërore.

Takimi i parë i përfaqësuesve specialë nga të dy vendet u mbajt më 14 janar në Moskë të Rusisë.

Sipas një deklarate të Ministrisë së Jashtme të Turqisë, palët shkëmbyen mendime paraprake mbi procesin “në një atmosferë pozitive dhe konstruktive” dhe “ranë dakord të vazhdojnë negociatat pa parakushte me qëllim normalizimin e plotë”.

Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
Tema relevante
Bu haberi paylaşın