Turqia

Türkiye dhe Izraeli fillojnë përpjekjet për t'i çuar misionet diplomatike në nivel ambasadorësh

“Dialogu pozitiv mes vendeve tona është pranuar edhe një herë që të vazhdojë me veprime konkrete, të prekshme”, tha Çavuşoğlu

Merve Gül Aydoğan Ağlarcı, Burak Dağ   | 23.06.2022
Türkiye dhe Izraeli fillojnë përpjekjet për t'i çuar misionet diplomatike në nivel ambasadorësh

Ankara

Türkiye dhe Izraeli kanë filluar përpjekjet për të ngritur përfaqësimin diplomatik në vendet përkatëse në nivel ambasadorësh, njoftoi sot ministri i Jashtëm turk, Mevlüt Çavuşoğlu, raporton Anadolu Agency (AA).

Duke theksuar rëndësinë e konsultimeve dypalëshe politike dhe rajonale, Çavuşoğlu gjatë një konference për shtyp me homologun e tij izraelit Yair Lapid tha se të dy vendet do të vazhdojnë vizitat e ndërsjella dhe negociatat politike në nivele të ndryshme.

“Dialogu pozitiv mes vendeve tona është pranuar edhe një herë që të vazhdojë me veprime konkrete, të prekshme”, shtoi Çavuşoğlu.

Ai theksoi se Ankaraja është në bashkëpunim me Tel Avivin për të luftuar terrorin dhe kërcënimet e mundshme kundër qytetarëve izraelitë, duke theksuar se Ankaraja nuk do të lejojë kurrë asnjë sulm terrorist në territorin e saj.

Nga ana e tij, Lapid përshëndeti inteligjencën turke për “zhbërjen e një komploti iranian në Stamboll”, duke thënë se Izraeli vlerëson qeverinë turke për “veprimtarinë profesionale dhe të koordinuar”.

“Jetët e qytetarëve izraelitë janë shpëtuar javët e fundit falë bashkëpunimit të sigurisë dhe diplomatik midis Türkiye-s dhe Izraelit”, tha ai.

Ministri i Jashtëm izraelit komentoi gjithashtu “kthimin e ambasadorëve në të ardhmen e afërt” dhe “përmirësimin e dialogut ekonomik dhe politik”, ndërsa shprehu shpresë që hapat në këtë çështje të përfundojnë së shpejti.

Në lidhje me turizmin, Lapid tha se “qëllimi i menjëhershëm i Izraelit është të sjellë qetësinë që do të na mundësojë të ndryshojmë paralajmërimin e udhëtimit për Türkiye-n”, ndërsa sezoni turistik arrin kulmin.

“Ne shpresojmë që në një të ardhme shumë të afërt, turistët izraelitë do të mund të kthehen në Türkiye pa frikë”, shtoi ai.

Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
Tema relevante
Bu haberi paylaşın