Rusia dëboi 5 diplomatë polakë
Në një deklaratë të publikuar në uebfaqen e saj, Ministria e Jashtme e Rusisë tha se ky hap është një përgjigje për dëbimin e tre diplomatëve rusë nga Polonia më 23 prill "në solidaritet me SHBA-në"
Moskë
Ministria e Jashtme e Rusisë konfirmoi se pesë punonjës të Ambasadës Polake në Rusi i ka shpallur "persona non grata", transmeton Anadolu Agency (AA).
Në një deklaratë të publikuar në uebfaqen e saj, ministria tha se ky hap është një përgjigje për dëbimin e tre diplomatëve rusë nga Polonia më 23 prill "në solidaritet me SHBA-në".
Javën e kaluar Rusia dhe SHBA-ja shkëmbyen një raund të ri sanksionesh, duke dëbuar 10 nga diplomatët e njëra-tjetrës dhe duke vendosur në listën e zezë më shumë zyrtarë.
Washingtoni shtrëngoi sanksionet ekonomike kundër Rusisë, ndërsa Moska ashpërsoi rregullat e punës për ambasadën amerikane dhe ndaloi aktivitetet e organizatave joqeveritare amerikane të financuara nga shteti në Rusi.
Ministria e Jashtme ruse kualifikoi demonstrimin e mbështetjes së Polonisë për SHBA-Në si një "ndjekje e qëllimshme e një kursi të degradimit dhe shkatërrimit të mëtejshëm të marrëdhënieve dypalëshe" me Rusinë.
"Përmes përpjekjeve të autoriteteve polake në vitet e fundit, kontaktet me Rusinë praktikisht janë ngrirë, një luftë e turpshme me monumentet sovjetike ka filluar, po bëhen përpjekje për të sulmuar projekte energjetike ruse, një fushatë e informacionit anti-rus në shkallë të gjerë është duke u zhvilluar, historia po falsifikohet dhe sanksionet anti-ruse të Perëndimit po zgjaten për një kohë të pacaktuar", thuhet nga ministria.
"Si përgjigje ndaj veprimeve provokuese të Polonisë për të dëbuar diplomatët rusë, bazuar në parimin e reciprocitetit, ministria shpalli pesë punonjës të Ambasadës së Republikës së Polonisë në Federatën Ruse" persona non grata", theksoi ministria.
Diplomatët e dëbuar duhet të largohen nga territori i Federatës Ruse deri më 15 maj, sipas deklaratës.