Politikë

Kuvendi i Shqipërisë miraton kabinetin e ri qeveritar

Pas një debati të gjatë parlamentar, me 77 vota pro, 53 kundër dhe 1 abstenim, Kuvendi i Shqipërisë miratoi përbërjen e re të qeverisë dhe programin politik të Këshillit të Ministrave të Republikës së Shqipërisë

Fatjon Cuka  | 17.09.2021 - Përdıtësım : 18.09.2021
Kuvendi i Shqipërisë miraton kabinetin e ri qeveritar

Tiranë

Qeveria e re e Shqipërisë e drejtuar nga kryeministri Edi Rama, ka marrë votëbesimin e deputetëve për mandatin e tretë qeverisës, raporton Anadolu Agency (AA).

Pas një debati të gjatë parlamentar, me 77 vota pro, 53 kundër dhe 1 abstenim, Kuvendi i Shqipërisë miratoi përbërjen e re të qeverisë dhe programin politik të Këshillit të Ministrave të Republikës së Shqipërisë.

Sipas vendimit të Kuvendit të Shqipërisë, Rama emërohet kryeministër dhe në postin e zëvendëskryeministrit dhe ministrit të Shtetit për Rindërtimin dhe Programin e Reformave emërohet Arben Ahmetaj.

Olta Xhaçka emërohet në postin e ministres për Evropën dhe Punët e Jashtme, Niko Peleshi në drejtimin e Ministrisë së Mbrojtjes dhe Bledar Çuçi në drejtimin e Ministrisë së Brendshme.

Në postin e ministres së Financave dhe Ekonomisë është emëruar Delina Ibrahimaj, ministre e Infrastrukturës dhe Energjisë Belinda Balluku, ministre e Shëndetësisë dhe Mbrojtjes Sociale Ogerta Manastirliu, ministre e Arsimit dhe Sportit Evis Kushi, ministër i Drejtësisë Ulsi Manja, ministre e Kulturës Elva Margariti, ministre e Bujqësisë dhe Zhvillimit Rural Frida Krifca dhe ministre e Turizmit dhe Mjedisit Mirela Kumbaro Furxhi.

Në përbërjen e qeverisë së re do të ketë edhe katër ministre shteti, ku Elisa Spiropali është emëruar ministre e Shtetit për Marrëdhëniet me Parlamentin, Edona Bilali si ministre e Shtetit për Mbrojtjen e Sipërmarrjes, Bora Muzhaqi ministre e Shtetit për Rininë dhe Fëmijët dhe Milva Ekonomi ministre e Shtetit për Standardet e Shërbimeve.

Pas ceremonisë së betimit në Presidencën e Shqipërisë, kabineti i ri qeveritar do të fillojë zyrtarisht detyrën.

Kujtojmë se legjislatura e re e Kuvendit të Shqipërisë e dalë nga zgjedhjet e 25 prillit të këtij viti, filloi punimet më 10 shtator me seancën e konstituimit dhe me zgjedhjen e kryetares së re të Kuvendit, Lindita Nikolla.

Fituese e zgjedhjeve të 25 prillit rezultoi Partia Socialiste e Shqipërisë, e drejtuar nga kryeministri Rama, e cila ka siguruar mandatin e tretë qeverisës, duke fituar 74 mandate nga 140 deputetë që ka Kuvendi i Shqipërisë.

Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
Tema relevante
Bu haberi paylaşın