BE, eksportet e makinerive dhe automjeteve u prekën më së shumti nga COVID-19
Sipas Eurostat, në mesin e eksporteve të mallrave jashtë BE-së rënia më e madhe u regjistrua në makineri dhe eksportin e automjeteve
Stamboll
Përderisa masat kufizuese për të frenuar përhapjen e koronavirusit të ri (COVID-19) kanë prekur një numër të madh të sektorëve, në Bashkimin Evropian (BE) eksportet e makinerive dhe automjeteve janë prekur më së shumti, transmeton Anadolu Agency (AA).
Sipas Eurostat, zyrës statistikore të BE-së, në mesin e eksporteve të mallrave jashtë BE-së rënia më e madhe në terma absolute u regjistrua në makineri dhe eksporte të automjeteve, gjegjësisht krahasuar me muajin janar një rënie me 14 miliardë euro ose 20 për qind në muajin mars.
Eksportet e mallrave të tjerë të prodhuar, në të njëjtën periudhë po ashtu shënuan rënie me 7 miliardë euro ose 16 për qind.
"Në terma relative, energjia u ul më së shumti (minus 2 miliardë euro ose minus 25 për qind)", tha Eurostat.
Në muajin mars eksportet e përgjithshme të bllokut ishin 228 miliardë euro krahasuar me 252 miliardë euro ë muajin janar.
Në të njëjtën periudhë, eksportet kimike të BE-së shënuan një rritje prej 4 miliardë euro ose 4 për qind.
Sa i përket importit, importet e makinerive dhe automjeteve shënuan rënie prej 15 për qind, mallrat e tjerë të prodhuar me 16 për qind dhe energjia me 31 për qind.
Kursi i këmbimit euro/dollarë ishte 1,11 në fund të muajit mars.
Pas shfaqjes për herë të parë dhjetorin e kaluar në Wuhan të Kinës, koronavirusi është përhapur në mbarë botën, ndërsa Organizata Botërore e Shëndetësisë (OBSH) shpërthimin e ka shpallur pandemi globale.
Sipas të dhënave nga Universieti "Johns Hopkins" me qendër në SHBA, numri i të infektuarve me këtë virus ka tejkaluar shifrën 5.1 milionë, me mbi 333 mijë të vdekur dhe pothuajse 2 milionë të shëruar.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.