Bota, Koronavirusi

Të paktën 127 gazetarë humbën jetën për 3 muaj nga COVID-19

Sipas "Press Emblem Campaign" me qendër në Gjenevë, rajoni më i prekur është Amerika Latine

Ekip   | 03.06.2020
Të paktën 127 gazetarë humbën jetën për 3 muaj nga COVID-19

Gjenevë

Të paktën 127 gazetarë në 31 vende kanë ndërruar jetë për shkak të koronavirusit të ri (COVID-19) gjatë tre muajve të fundit, njoftoi "Press Emblem Campaign" (PEC) me qendër në Gjenevë, transmeton Anadolu Agency (AA).

"Punonjësit e mediave luajnë një rol të rëndësishëm në luftën kundër COVID-19. Ata duhet të informojnë për përhapjen e sëmundjes", tha Sekretari i Përgjithshëm i PEC, Blaise Lempen në një deklaratë.

"Një numër prej tyre humbën jetën për mungesë të masave adekuate mbrojtëse deri sa kryenin punën e tyre", tha ai.

Sipas organizatave joqeveritare, midis 1 marsit dhe 31 majit, të paktën 127 gazetarë kanë vdekur si pasojë e COVID-19. Rreth dy të tretat e tyre ishin në detyrë.

Vetëm në maj u regjistruan 72 viktima.

Sipas rajonit, Amerika Latine është kontinenti më i prekur me të paktën 62 gazetarë të vdekur, e ndjekur nga Evropa me 23, Azia 17, Amerika e Veriut 13 dhe Afrika 12.

Peru është vendi me numrin më të madh të viktimave, 15, e ndjekur nga Brazili dhe Meksika me 13 viktima secila dhe 12 në Ekuador.

SHBA-të regjistruan 12 gazetarë të vdekur, ndërsa nga 8 Rusia dhe Pakistani.

Më pas radhitet Mbretëria e Bashkuar me 5, Bangladeshi me 4 vdekje, pastaj me nga 3 vdekje në Bolivi, Kamerun, Republikën Dominikane, Francë, Indi, Itali dhe Spanjë.

Nga dy viktima në mesin e gazetarëve u identifikuan në Algjeri, Kolumbi, Egjipt, Suedi dhe një në Austri, Belgjikë, Kanada, Iran, Japoni, Marok, Nikaragua, Nigeri, Afrikën e Jugut, Togo dhe Zimbabve.

Disa qindra punonjës të tjerë të mediave rezultuan pozitivë me virusin ndërsa disa media u detyruan të mbylleshin përkohësisht.

PEC bëri të ditur se numërimi i saj bazohet në burime të shumta, përfshirë shoqatat kombëtare të gazetarëve, mediat lokale dhe korrespondentët e PEC në të gjithë botën.

Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
Tema relevante
Bu haberi paylaşın