Serbi, humbin jetën 2 pilotë në rrëzimin e MiG-21
Dy pilotë të ushtrisë serbe humbën jetën në rrëzimin e avionit, i cili ndodhi rreth orës 9:10 të mëngjesit në zonën e fshatit Brasina, afër qytezës Mali Zvornik
Sarajevë
Kanë humbur jetën 2 pilotët e avionit ushtarak që u rrëzua sot afër qytezës Mali Zvornik në Serbi, njoftoi Ministria e Mbrojtjes së Serbisë, transmeton Anadolu Agency (AA).
Në deklaratën e ministrisë thuhet se dy pilotë të ushtrisë serbe humbën jetën në rrëzimin e avionit, i cili ndodhi rreth orës 9:10 të mëngjesit në zonën e fshatit Brasina, afër Mali Zvornik, ndërsa ishte në kryerje të detyrës.
"Ministria e Mbrojtjes do të informojë publikun për emrat e pilotëve pasi të informojë anëtarët e familjes", thuhet në njoftim.
Pas hetimit, Shefi i Shtabit të Përgjithshëm të Forcave të Armatosura formoi Komisionin për hetimin e ngjarjes së jashtëzakonshme, të kryesuar nga Shefi i Drejtorisë për zhvillimin dhe pajisje ndërsa komandanti i Forcave Ajrore dhe Mbrojtjes Ajrore formoi komisionin për përcaktimin e shkakut të aksidentit të MiG-21.
Vendin e rrëzimit të avionit, i cili nuk është larg kufirit me Bosnjë e Hercegovinën e vizitoi ministri i Mbrojtjes së Serbisë, Aleksandar Vulin, shefi i Shtabit të Përgjithshëm të ushtrisë serbe, Millan Mojsilloviç dhe komandanti i Forcës Ajrore dhe Mbrojtjes Ajrore, gjeneral majori, Dushko Zharkoviç.
Telegram ngushëllimi për familjet dërguan presidenti i Serbisë, Aleksandar Vuçiç si dhe Vulin dhe Mojsilloviç.
Siç thuhet, avioni MiG-21 u inspektua para se të nisej sipas të gjitha procedurave dhe pas inspektimit u përcaktua se ishte në gjendje të regullt dhe i gatshëm për fluturim.