Rusia tha se ka marrë përgjigje me shkrim nga SHBA-ja për propozimin e saj për garancitë e sigurisë, transmeton Anadolu Agency (AA).

Sipas një deklarate me shkrim nga Ministria e Jashtme ruse, ambasadori amerikan në Moskë John Sullivan ka mbërritur në ndërtesën e ministrisë për të dhënë personalisht përgjigjen e SHBA-së.

Sullivan është takuar me zëvendësministrin e jashtëm rus Aleksander Grushko në ministri, thuhet gjithashtu në deklaratë.

Rusia kohët e fundit ka grumbulluar 100.000 trupa pranë Ukrainës, duke shkaktuar shqetësime se Kremlini mund të planifikojë një tjetër ofensivë ushtarake kundër fqinjit të tij ish-sovjetik.

Moska ka mohuar se po përgatitet për pushtim dhe ka thënë se trupat e saj janë atje për stërvitje. Në vend të kësaj, ajo ka lëshuar një listë kërkesash sigurie për SHBA-në dhe NATO-n, duke përfshirë mosanëtarësimin e Ukrainës në NATO, për të qetësuar tensionet ekzistuese.