Mali i Zi duhet ta zhvillojë politikën e tij ndaj Republikës së Turqisë me "mesazhe të qarta miqësie", tha sot ministri i Jashtëm, Ervin Ibrahimoviq, duke theksuar se marrëdhëniet midis dy vendeve janë historike, gjithëpërfshirëse dhe të bazuara në bashkëpunimin e partneritetit brenda NATO-s, raporton Anadolu.

Ibrahimoviq foli në një seancë dëgjimore kontrolluese para Komisionit parlamentar për Marrëdhënie Ndërkombëtare, të mbajtur pas vendimit të qeverisë në fund të tetorit për të hequr regjimin pa viza për shtetasit turq pas një sulmi me thikë në lagjen Zabjelo të Podgoricës.

"Marrëdhëniet midis Malit të Zi dhe Turqisë janë gjithëpërfshirëse, historike, miqësore, partnere në NATO dhe me interes për qytetarët e të dy vendeve", tha Ibrahimoviq duke shtuar: "Në të njëjtën kohë, duhet të jemi të kujdesshëm, të vetëdijshëm se ky është një vend i madh dhe të zhvillojmë politikë me mesazhe të qarta miqësie".

Dy shtetas turq u arrestuan fillimisht pas një incidenti në të cilin u plagos një shtetas malazez, por u liruan kur pamjet e kamerave të sigurisë treguan se ata nuk ishin në vendngjarje. Sulmi përfundimisht iu atribuua dy shtetasve azerbajxhanas.

Ibrahimoviq tha se ministrat e Partisë Boshnjake nuk e mbështetën vendimin për të vendosur vizat, por theksoi se ai dhe kryeministri Milojko Spajiq ndajnë të njëjtat pikëpamje mbi politikën e jashtme, NATO-n dhe marrëdhëniet me Turqinë.

"Kjo Qeveri dëshiron të përmirësojë më tej marrëdhëniet me Republikën e Turqisë", tha ai, duke shprehur bindjen se një vizitë zyrtare e kryeministrit malazez në Ankara do të realizohet në periudhën e ardhshme.

- ⁠Reagimet publike dhe rritja e ksenofobisë

Duke iu referuar ngjarjeve pas incidentit, Ibrahimoviq tha se Mali i Zi kishte parë një "paradë ksenofobie" dhe sulme ndaj pronës së qytetarëve turq.

"Disa struktura krijonin atmosferë negative. Ky nuk është Mali i Zi për të cilin po luftojmë. Duhet të jemi shumë më të përgjegjshëm në paraqitjet tona publike", tha ai, sipas mediave lokale.

Pavarësisht tensioneve, ai theksoi se marrëdhëniet midis Podgoricës dhe Ankarasë mbeten "dinamike" dhe se bashkëpunimi vazhdon.

- Opozita potencon dështimet e institucioneve

Partia Demokratike e Socialistëve (DPS) në opozitë kërkoi seancë dëgjimore kontrolluese.

Deputeti i DPS-së, Andrija Nikoliq, tha se informacioni i pasaktë nga institucionet shtetërore shkaktoi reagim të panevojshëm nga një pjesë e publikut ndaj shtetasve turq.

Nikoliq kujtoi se policia fillimisht njoftoi se në sulm morën pjesë shtetas turq, gjë që shkaktoi pakënaqësi, megjithëse më vonë u konfirmua se autorët ishin azerbajxhanas.

"Nëse deklaratat dhe vendimet e rrezikshme vijnë nga institucionet shtetërore, atëherë është logjike që marrëdhëniet e mira me Turqinë po dëmtohen", tha ai.

Mali i Zi vendosi viza për shtetasit turq pas incidentit të 25 tetorit ndërsa dy shtetas turq që ishin ndaluar më parë u liruan pasi një gjykatë vendosi se ata nuk ishin në vendin e sulmit.

Incidenti, për të cilin mediat lokale fillimisht raportuan se janë të përfshirë shtetas turq, shkaktoi një valë ndjenjash anti-turke në disa pjesë të Podgoricës.