Politikë, Bota

Kandidati konservator për kancelar të Gjermanisë premton të rrisë lidhjet me Turqinë

"E di sa e rëndësishme është Turqia për ne, si një anëtar i NATO-s, si një vend i lidhur ngushtë me Evropën, me shumë (fusha) bashkëpunimi", tha Laschet të hënën në një intervistë ekskluzive për AA

Ayhan Şimşek   | 21.09.2021
Kandidati konservator për kancelar të Gjermanisë premton të rrisë lidhjet me Turqinë

Berlin

Kandidati konservator gjerman për kancelar Armin Laschet ka premtuar të përmirësojë lidhjet me Turqinë nëse partia e tij fiton zgjedhjet parlamentare të dielën, raporton Anadolu Agency (AA).

"E di sa e rëndësishme është Turqia për ne, si një anëtar i NATO -s, si një vend i lidhur ngushtë me Evropën, me shumë (fusha) bashkëpunimi", tha Laschet të hënën në një intervistë ekskluzive për AA.

"Si një mik i Turqisë, shpresoj se me punën time si kancelar, marrëdhëniet do të përmirësohen përsëri. Ne duhet të punojmë për këtë", theksoi ai.

Politikani 60-vjeçar me përvojë, i cili është kreu i Unionit Kristian-Demokratik (CDU), ka shpresë se blloku konservator do të fitojë zgjedhjet dhe ai do të pasojë Angela Merkelin si kancelare.

Laschet vlerësoi kontributet e komunitetit turk të Gjermanisë në vend dhe tha se brezi i parë i emigrantëve turq punoi shumë në rindërtimin e ekonomisë dhe shumë nga brezat e dytë dhe të tretë janë integruar me sukses në shoqëri.

"Një nga qëllimet e mia do të ishte të siguroja që shoqëria gjermane të njohë këtë potencial të madh", tha ai, dhe premtoi se do të ndërmarrë hapa për të çrrënjosur të gjitha format e diskriminimit dhe për të arritur mundësi të barabarta për të gjithë njerëzit me prejardhje migrante.

Laschet tha se nëse partia e tij fiton zgjedhjet dhe formon qeverinë e re, rritja ekonomike, dixhitalizimi dhe ndryshimet klimatike do të jenë prioritet e tyre kryesore.

"Gjëja më e rëndësishme është që ne duhet të përqendrohemi në rritjen ekonomike përsëri pas pandemisë së koronavirusit", tha ai, duke shtuar se do të zbatojnë programe të reja për të modernizuar vendin, për të arritur qëllimet mbi dixhitalizimin, tranzicionin e energjisë dhe mbrojtjen e klimës.

Ai po ashtu premtoi politikë të jashtme aktive, duke theksuar se Gjermania do të vazhdojë të veprojë në mënyrë të përgjegjshme.

"Ne do të vazhdojmë të japim kontributet tona për botën. Ne kemi qenë dëshmitarë të një katastrofe në Afganistan. Do të mbetet e rëndësishme për ne që të japim kontributet tona për stabilitetin në botë", tha ai.

Votuesit gjermanë do të zgjedhin një parlament të ri më 26 shtator dhe rezultati do të përcaktojë se kush do të pasojë Merkelin si kancelare, pasi ajo nuk kandidohet për një mandat tjetër.

Derisa Social-Demokratët udhëheqin në anketat më të fundit, Laschet ende është me shpresë se blloku i tij konservator CDU/CSU do të fitojë zgjedhjet, pasi sondazhet tregojnë se shumë votues janë ende të pavendosur disa ditë para votimeve.



Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
Tema relevante
Bu haberi paylaşın