Ministri i Punëve të Jashtme i Iranit, Hossein Amir-Abdollahian, ka deklaruar se mund të arrihet një marrëveshje në negociatat që vazhdojnë mbi programin bërthamor në Vjenë nëse vendet perëndimore tregojnë "vullnet të mirë", transmeton Anadolu Agency (AA).

Në mesazhin e publikuar në llogarinë e tij në twitter, kryediplomati iranian vlerësoi bisedimet midis Iranit dhe palëve në marrëveshjen bërthamore në Vjenë të Austrisë.

Ai tha se ishte në kontakt të përditshëm me Ali Bagherin, kryenegociator dhe zëvendësministër i Jashtëm që përfaqësonte Iranin në takime dhe sipas tij bisedimet po përparojnë në përputhje me prioritetet bazë si serioziteti dhe heqja e sanksioneve.

"Nëse Perëndimi tregon vullnet të mirë, mund të arrihet një marrëveshje e mirë. Ne po kërkojmë dialog të arsyeshëm, të matur dhe të orientuar drejt rezultateve", tha Abdollahian.

Raundi i shtatë i bisedimeve midis Iranit dhe palëve në marrëveshjen bërthamore, në të cilin u negociua rikthimi i marrëveshjes dhe kthimi i SHBA-së në marrëveshje, rifilloi më 29 nëntor pas një ndërprerjeje prej pesë muajsh.

Nën koordinimin e Bashkimit Evropian (BE), në bisedime marrin pjesë Rusia, Kina, Britania, Franca dhe Gjermania (4+1) dhe në mënyrë indirekte merr pjesë edhe SHBA-ja, e cila u tërhoq në mënyrë të njëanshme nga marrëveshja në vitin 2018.