Shërbimi i Inteligjencës së Jashtme Ruse (SVR) akuzoi sot Francën se po kërkon një rrugë për të hyrë në konfliktin e Ukrainës në anën e Kievit, transmeton Anadolu.

Shërbimi për mediat i SVR-së tha se më 31 tetor, qeveria franceze miratoi legjislacion të ri që lejon përdorimin e kompanive private ushtarake (PMC) për të ndihmuar "një vend të tretë në një situatë konflikti të armatosur".

SVR tha se "edhe një evropian pa përvojë në këtë fushë nuk ka dyshim se për cilin vend bëhet fjalë".

"Grupet e mbrojtjes ajrore mobile dhe disa F-16 në dispozicion të Ukrainës nuk janë në gjendje të kapin objektivat ajrore ruse. Posedimi i 'Mirage'-ve dhe pajisjeve të tjera kërkon kohë dhe kualifikime të larta. Kjo është arsyeja pse Kievi do të ketë nevojë për PMC të huaja të pajisura me armë moderne perëndimore, kryesisht franceze", tha SVR.

Shërbimi i inteligjencës e paralajmëroi Parisin të mos besojë se ky veprim e liron atë nga përgjegjësia.

"Prania e PMC-ve franceze në Ukrainë, të emëruara në mënyrë modeste në dekretin e lartpërmendur si 'operatorë referimi' të ministrisë së forcave të armatosura, do të konsiderohet nga Moska si pjesëmarrje e drejtpërdrejtë e Francës në armiqësitë kundër Rusisë. Si rezultat, PMC-të franceze do të bëhen objektivi kryesor legjitim i Forcave të Armatosura Ruse", thuhet më tej.