Qindra persona protestuan kundër ndotjes së ajrit në kryeqytetin e Indisë, New Delhi, dhe i bënë thirrje qeverisë të ndërmarrë veprime urgjente, transmeton Anadolu.

Sipas lajmit të "Hindustan Times", nivelet e ndotjes së ajrit në New Delhi kanë rritur në 392, duke tejkaluar nivelin 300 që konsiderohet "i rrezikshëm" në Indeksin e Cilësisë së Ajrit (AQI).

Pas kësaj, qindra njerëz, përfshirë aktivistë mjedisorë dhe familje, u mblodhën para monumentit të Portës së Indisë në kryeqytet për të protestuar kundër ndotjes së ajrit që ka tejkaluar nivelet që konsiderohen të dëmshme për shëndetin e njeriut.

Protestuesit, duke mbajtur pankarta, i bënë thirrje qeverisë të marrë masa urgjente për të ulur ndotjen e ajrit. Policia ndërhyri ndaj protestës me arsyetimin se nuk kishin leje, duke ndaluar disa demonstrues.

Qeveria indiane ka njoftuar fillimin e testimit të "shiut artificial" duke lëshuar kimikate në ajër në pjesë të caktuara të qytetit si pjesë e përpjekjeve të saj për të ulur ndotjen e ajrit në New Delhi.

New Delhi dhe shtetet përreth përballen me nivele të larta të ndotjes së ajrit çdo dimër për shkak të gazrave të shkarkimit, djegies së drurit, qymyrit ose kashtës dhe shpejtësisë së ulët të erës.