Grupet e armatosura nga jugu i Libisë shpallin mbështetje për qeverinë

Grupe të ndryshme të armatosura nga jugu i Libisë sot shpallën mbështetjen e tyre për qeverinë legjitime në luftën e saj kundër kryekomandantit Khalifa Haftar, transmeton Anadolu Agency (AA).

Anëtarët e Ushtrisë Libiane, trupat revolucionare dhe përforcimet në qytetin Awbari, i cili është vendbanim i Tuaregëve libianë, ritheksuan në një deklaratë të përbashkët besnikërinë e tyre ndaj qeverisë së njohur ndërkombëtarisht të Libisë, njoftuan nga operacioni "Vullkani i Tërbimit".

Duke nënvizuar se territori i Libisë është një tërësi e pandarë, në deklaratë thuhet: "Ne jemi të gatshëm të luftojmë për të rifituar sovranitetin e Libisë dhe për të rivendosur autoritetin shtetëror në vend."

Tuaregët njihen si një komunitet unik për zakonet, traditat dhe mënyrën e jetesës si beduinë.

Ushtria Libiane ka arritur fitore të konsiderueshme ushtarake kundër milicive të Haftarit ditët e fundit, duke kapur qytetin Wadi Wishka dhe dy zona të tjera në jug të qytetit Sirte.

Të shtunën, ushtria nisi një operacion ushtarak për të çliruar qytete të Libisë lindore dhe qendrore nga milicitë e Haftarit, një ditë pasi kapi qytetin strategjik të Tarhuna, që ishte fortesa e fundit e Haftarit në Libinë perëndimore.

Qeveria e njohur ndërkombëtarisht e Libisë ka qenë e sulmuar nga forcat e Haftarit që nga prilli i vitit 2019, ndërsa mbi 1.000 persona kanë humbur jetën nga dhuna.