Politikë, Bota, Ekonomi

BE-ja zgjat sanksionet ekonomike kundër Rusisë

Sanksionet janë në fuqi që nga viti 2014 dhe së fundmi janë vazhduar për 6 muaj të tjerë

Ekip   | 13.01.2022
BE-ja zgjat sanksionet ekonomike kundër Rusisë

Bruksel

Bashkimi Evropian zgjati sanksionet ekonomike kundër Rusisë edhe për gjashtë muaj të tjerë, transmeton Anadolu Agency (AA).

“Këshilli (i Bashkimit Evropian) vendosi sot të zgjasë masat kufizuese që aktualisht kanë në shënjestër sektorë specifikë ekonomikë të Federatës Ruse me gjashtë muaj, deri më 31 korrik 2022”, njoftoi në një deklaratë institucioni i BE-së që përfaqëson shtetet anëtare.

Krerët e shteteve dhe qeverive të BE-së kishin miratuar tashmë vazhdimin e sanksioneve gjatë samitit të tyre të fundit në dhjetor për shkak të dështimit në përmbushjen e angazhimeve ndaj Marrëveshjes së Minskut që synon të vendosë paqen në Ukrainën lindore.

Blloku ka vendosur sanksione ndaj sektorëve financiarë, ushtarakë dhe energjetikë të Rusisë që nga viti 2014, duke akuzuar Moskën për aktivitete destabilizuese në Ukrainë.

Sipas kufizimeve, disa banka dhe kompani ruse kanë akses të kufizuar në tregjet e kapitalit të bllokut, ndërsa operatorëve të BE-së u ndalohet të ofrojnë shërbime për institucionet financiare ruse.

BE-ja gjithashtu kufizon tregtinë me mallra të lidhura me mbrojtjen dhe teknologjitë e ndjeshme që mund të përdoren në sektorin energjetik të Rusisë.

Në vitin 2014, Moska filloi të mbështesë forcat separatiste në Ukrainën lindore kundër qeverisë qendrore, një politikë që ajo e ka vazhduar në shtatë vitet e fundit.

BE-ja ka dënuar në mënyrë të përsëritur stacionimin e vazhdueshëm ushtarak rus në dhe rreth Ukrainës në muajt e fundit dhe ka mbrojtur integritetin territorial dhe sovranitetin e këtij vendi.

Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.
Tema relevante
Bu haberi paylaşın