Sllovakia ratifikon protokollin për anëtarësimin e Maqedonisë së Veriut në NATO
Sllovakia u bë anëtari i njëmbëdhjetë i NATO-s që ratifikoi protokollin për anëtarësimin e Maqedonisë në NATO, i nënshkruar më 6 shkurt të këtij viti nga vendet anëtare
Shkup
Parlamenti sllovak sot miratoi Protokollin e Anëtarësimit të Maqedonisë së Veriut në NATO, transmeton Anadolu Agency (AA).
Me këtë, Sllovakia u bë anëtari i njëmbëdhjetë i NATO-s që ratifikoi protokollin.
"Parlamentet e Polonisë dhe Sllovakisë ratifikuan protokollin për anëtarësimin e Maqedonisë së Veriut në NATO. Shkojmë hap pas hapi drejt qëllimit - Republika e Maqedonisë së Veriut, anëtare e NATO-s", shkroi në profilin e saj në Facebook ministrja e Mbrojtjes Radmilla Sekerinska.
Më herët gjatë ditës, protokolli u ratifikua edhe në Parlamentin e Polonisë.
Vendi i parë që ratifikoi Protokollin ishte Greqia, e ndjekur nga Sllovenia, Shqipëria, Bullgaria, Kroacia, Mali i Zi, Rumania, Lituania, Danimarka dhe sot Polonia dhe Sllovakia.
Vendet anëtare nënshkruan protokollin për anëtarësimin e Maqedonisë së Veriut më 6 shkurt të këtij viti.
Protokolli duhet të ratifikohet në parlamentet e të gjitha 29 vendeve anëtarë të Aleancës, në mënyrë që Maqedonia e Veriut zyrtarisht të bëhet anëtare e plotë.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.