ЗАГРЕБ

Според анкетата објавена во 19.55 часот која агенцијата Ипсос ја објави за сите домашни телевизии, Хрватската демократска заедница (ХДЗ) има еден мандат повеќе, а Рестарт коалицијата има еден мандат помалку во однос на првите излезни анкети објавени во 19 часот, јавува Агенција Анадолија (АА).

Анкетата на „Ипсос" агенцијата која е спроведена на преку 21.500 граѓани покажува дека ХДЗ освојува дури 62 мандати, а Рестарт коалицијата во која водечка партија е СДП, 43 мандати.

„Татковинско движење" предводено од Мирослав Шкоро добива 14 пратенички мандати, иако првите анкети покажуваа 16, додека „Мост" (независна листа) освојува 9 наместо првобитно проценетите 6 пратенички мандати.

Коалицијата „Можеме!" која ги собира партиите од лева политичка ориентација е изненадување на изборите со освоени 8 пратенички мандати, „Паметно" и „Фокус" освојуваат 3, Хрватскиот национален сојуз (ХНС), коалиционен партнер на ХДЗ во претходната влада, освојува 1 мандат.

Останатите места за 10. состав на Хрватскиот сабор во кој ќе седат 151 пратеник го пополнуваат малцинските и листите на дијаспората кои имаат однапред одреден број мандати.

За освојување мнозинство, на идниот мандатар и составувач на новата Влада, а се очекува тоа да биде ХДЗ, ќе му требаат најмалку 76 пратеници за да претседателот на Република Хрватска Зоран Милановиќ им ја даде довербата.